Azərbaycana kredit qoyuluşu 30 milyard manatı ötüb - İlk dəfə

Bu ilin iyunun 1-nə Azərbaycan iqtisadiyyatına kredit qoyuluşu 30 milyard 188,8 milyon manat təşkil edib.

Sfera.az xəbər verir ki, bu haqda məlumatı “Report” Azərbaycan Mərkəzi Bankına (AMB) istinadən açıqlayıb. 

Məlumata əsasən, kredit qoyuluşu aylıq müqayisədə 1 %, ilin əvvəlinə nisbətən 3,1 %, 2024-cü ilin eyni dövrü ilə müqayisədə isə 13,9 % çoxdur.

Kredit qoyuluşunun 20 milyard 980,4 milyon manatı və yaxud 69,5 %-i özəl bankların payına düşüb. Bu, bir il əvvələ nisbətən 12,1 % çoxdur.

Hesabat tarixinə dövlət banklarının kredit qoyuluşu 7 milyard 406,1 milyon manat təşkil edib. Bu, illik müqayisədə 14,8 % çoxdur. İl ərzində dövlət banklarının ümumi kredit qoyuluşundakı xüsusi çəkisi 24,3 %-dən 24,5 %-ə yüksəlib.

İyunun 1-nə bank olmayan kredit təşkilatlarının (BOKT) kredit qoyuluşu 1 milyard 802,3 milyon manat olub. Bu, illik müqayisədə 34,5 % çoxdur. İl ərzində BOKT-ların ümumi kredit qoyuluşundakı xüsusi çəkisi 5,2 %-dən 6 %-ə çatıb.

Azərbaycanda 22 bank fəaliyyət göstərir, onlardan 2-si dövlət payına malikdir. BOKT-ların sayı isə 56-dır.