İran XİN-dən sərt bəyanat: "Çox gecdir, cənab..."
İran Xarici İşlər Nazirliyinin sözçüsü Əsəmail Baqai “X” (keçmiş Twitter) sosial şəbəkəsində paylaşdığı bəyanatında Beynəlxalq Atom Enerjisi Agentliyinin (MAQATE) baş direktoru Rafael Qrossini sərt tənqid edib.
Sfera.az bildirir ki, İran XİN rəsmisi Qrossini nüvə silahının yayılmaması rejimini pozmaqda və İran əleyhinə əsassız müharibəyə şəriklikdə ittiham edib.
Qrossinin İranın nüvə silahı hazırlamaq yönündə sistemli səylərinə dair heç bir sübutlarının olmadığına dair bəyanatına Baqai belə cavab verib:
“Çox gecdir, cənab Qrossi. Siz bu həqiqəti öz qərəzli hesabatınızda gizlətdiniz. Həmin hesabat Fransa, Almaniya, Böyük Britaniya və ABŞ tərəfindən İranın “razılaşmaya əməl etməməsi” ilə bağlı əsassız qətnamə hazırlamaq üçün alətə çevrildi. Həmin qətnamə isə genosidçi və müharibəçi bir rejimin İrana qarşı aqressiv müharibə başlatması və sülhməramlı nüvə obyektlərimizə hücum etməsi üçün son bəhanə oldu”.
Baqai bildirib ki, bu proses nəticəsində günahsız iranlılar həlak olub və şikəst qalıb:
“Bu cinayətkar müharibə nəticəsində neçə günahsız iranlı ölüb və ya yaralanıb, bilirsinizmi? Bu, BMT rəhbərliyinə iddialı olan bir beynəlxalq məmur üçün testdirmi?
Cənab Qrossi, sizi xəbərdar edirik: yanlış və yönləndirilmiş narrativlərin ağır nəticələri olur və bunun üçün cavabdehlik tələb olunur".
Nazirlik rəsmisi həmçinin MAQATE rəhbərini ittiham edərək bildirib ki, Qrossi təşkilatı siyasi təzyiq alətinə çevirib:
“Siz nüvə silahının yayılmaması rejimini satqınlığa uğratdınız. MAQATE-ni bu ədalətsiz müharibəyə şərik etdiniz.
MAQATE-ni NPT üzvü olmayan rejimlərin əlində alətə çevirdiniz ki, onlar NPT üzvü olan ölkələri müqavilə üzrə 4-cü maddədəki haqlarından məhrum etsinlər.
Vicdanınız sakitdirmi?!”
İran MAQATE-ni uzun müddətdir qərəzli mövqe tutmaqda ittiham edir və nüvə proqramının tamamilə dinc məqsədlərlə aparıldığını bildirir.
Əlavə olaraq bu açıqlama, beynəlxalq arenada İranla bağlı gərginliyin artdığı və nüvə məsələsinin yenidən diqqət mərkəzinə gəldiyi bir vaxta təsadüf edir.
İnci
