ABŞ xalqı İrana hücumu dəstəkləyirmi? – Sorğu

ABŞ-nin “Wall Street Journal” (WSJ) nəşrinin keçirdiyi rəy sorğusuna əsasən, amerikalıların önəmli hissəsi ölkələrinin İrana qarşı mümkün hava hücumlarını dəstəkləmir. Sorğuda iştirak edən respondentlərin 45 faizi açıq şəkildə bu cür hərbi əməliyyatlara qarşı olduğunu bildirib.

1000 nəfərin iştirak etdiyi sorğuda iştirakçıların 30 faizi bu barədə qərarsız olduğunu, yalnız 25 faizi isə İrana qarşı hava zərbələrini dəstəklədiyini qeyd edib.

Sfera.az “TRT Haber”ə istinadən xəbər verir ki, sorğu nəticələri göstərib ki, Demokrat Partiyasını dəstəkləyənlərin üçdə ikisi İrana qarşı mümkün hava hücumlarına qarşı çıxır.

Respublikaçılar arasında isə bu məsələdə fikir ayrılığı var. Belə ki, respondent respublikaçıların 47 faizi zərbələri dəstəklədiyini, 24 faizi əleyhinə olduğunu, 29 faizi isə mövzu ilə bağlı fikir bildirmədiyini qeyd edib.

Rəy sorğusunda iştirak edən hər 10 nəfərdən 7-si İsrailin İrana qarşı həyata keçirdiyi son hücumlarla bağlı məlumata sahib olduğunu bildirib. Respondentlərin 39 faizi ABŞ-nin İranla genişmiqyaslı müharibəyə girəcəyindən ciddi şəkildə narahat olduqlarını qeyd edib. 43 faiz bu ehtimaldan qismən narahat olduğunu bildirib.

Eyni zamanda sorğu iştirakçılarının 70 faizi İranın nüvə proqramını ABŞ üçün potensial təhlükə kimi dəyərləndirib. Bu nəticələr ABŞ ictimaiyyətində İranla bağlı narahatlığın yüksək olduğunu ortaya qoyur.

Bəsti Rəfizadə
Sfera.az