İran hökumətindən xəbərdarlıq: ““WhatsApp”ı silin”

İran hökuməti ölkə vətəndaşlarına rəsmi xəbərdarlıq edərək, dünyada ən çox istifadə olunan mesajlaşma platformalarından biri olan “WhatsApp”ın telefonlardan silinməsini tövsiyə edib. Rəsmi açıqlamada tətbiqin etibarsız olduğu və istifadəçi məlumatlarını İsrail institutlarına ötürdüyü iddia olunur.

Sfera.az xarici mediaya istinadən xəbər verir ki, İran Radio və Televiziya Qurumu (İRİB) vasitəsilə yayımlanan açıqlamada qeyd olunur ki, “WhatsApp”, “Telegram” və digər yer müəyyən edən tətbiqlər vasitəsilə istifadəçilərin hərəkətləri izlənilə bilər. Buna görə də vətəndaşlara bu cür proqramlardan uzaq durmaq tövsiyə olunur.

Bu gərgin fonda İran rəsmiləri kiberhücumların artdığını, xüsusilə İranlı alimlərə və yüksək rütbəli hərbçilərə qarşı həyata keçirilən sui-qəsdlərdə mobil telefon izləmələrinin istifadə edildiyini bildiriblər.

Rəsmilər eyni zamanda başqa xəbərdarlıqlar da ediblər:

“Xüsusilə ictimai yerlərə gedərkən və ya böyük insan kütləsi ilə bir yerdə olarkən mobil telefonlar evdə saxlanmalıdır. Həssas dövlət qurumlarında çalışan şəxslər isə yalnız təhlükəsiz rabitə vasitələrindən istifadə etməli, etibarsız tətbiqlərdən uzaq durmalıdır”.

İran hökumətinin bu xəbərdarlığı, ölkədə rəqəmsal təhlükəsizlik məsələlərinin artıq milli təhlükəsizlik səviyyəsində qiymətləndirildiyini göstərir.

Bəsti Rəfizadə
Sfera.az