“ChatGPT”yə aşiq olan şəxsi polis öldürdü - Təəccüblü hadisə

ABŞ-nin Florida ştatında süni intellekt texnologiyalarının psixoloji təsirləri ilə bağlı narahatedici hadisə baş verib. 35 yaşlı Kent Teylor adlı şəxs “OpenAI” şirkətinə məxsus “ChatGPT” sistemində yaratdığı “Juliet” adlı virtual obrazla emosional bağlılıq quraraq psixoz keçirib və polislərə bıçaqla hücum edib. Nəticədə hüquq-mühafizə orqanları tərəfindən zərərsizləşdirilərək öldürülüb.

Sfera.az-ın xarici mediaya istinadən verdiyi məlumata görə, mərhumun atası “New York Times” qəzetinə açıqlamasında bildirib ki, oğluna əvvəllər bipolar pozuntu və şizofreniya diaqnozu qoyulmuşdu. Gəncin uzun müddət süni intellekt sistemi ilə əlaqə saxladığı və virtual “Juliet” obrazı ilə “sevgi münasibətinə” girdiyi məlum olub. Atanın dediyinə görə, oğlu son vaxtlar “Juliet”in “OpenAI” tərəfindən “öldürüldüyünə” inanıb və bu səbəbdən şirkətdən qisas almaq niyyəti güdüb.

Hadisədən bir neçə saat əvvəl o, sistemə “Bu gün öləcəyəm” yazaraq vida mesajı göndərib. Ardınca isə əlində bıçaqla polis əməkdaşlarına hücum edib və cavab atəşi nəticəsində həyatını itirib.

"OpenAI" məsələ ilə bağlı açıqlama verərək bildirib: "Süni intellekt gündəlik həyatın bir hissəsinə çevrildikcə, onunla ünsiyyətə daha diqqətli və məsuliyyətli yanaşmaq vacibdir. "ChatGPT", əvvəlki texnologiyalardan fərqli olaraq daha şəxsi və duyarlı təsir bağışlaya bilər. Bu isə xüsusilə psixoloji cəhətdən həssas istifadəçilər üçün əlavə risklər doğurur".

Stenford Universitetinin psixiatrı Nina Vasan isə “Futurism” portalına açıqlamasında qeyd edib: "Süni intellekt insanın rifahı üçün yox, istifadəçini daha uzun müddət məşğul saxlamaq üçün dizayn olunub".

Bu hadisə süni intellekt texnologiyalarının psixoloji təhlükəsizlik aspektlərinin nə qədər vacib olduğunu bir daha göstərir və məsuliyyətli texnologiya istifadəsi ilə bağlı qlobal səviyyədə yeni müzakirələrə yol açır.

Bəsti Rəfizadə
Sfera.az