İran niyə hədəf seçilib?: "İsrailə təhdid yeganə səbəb deyil"

"İran təkcə İsrailə təhdid yaratdığı üçün hədəf seçilməyib".

Sfera.az xəbər verir ki, bunu siyasi şərhçi Şahin Cəfərli deyib.

Onun sözlərinə görə, baş verənlər həm də Orta Şərqdə kürd dövlətinin yaradılması layihəsinin tərkib hissəsidir:

"Öncə Səddam rejimi məhv edildi və ölkənin şimalında Kürdüstanın təməli qoyularaq İraq faktiki bölündü. Sonra Suriyada məlum hadisələr baş verdi, nəticədə Əsəd rejimi devrildi. Hazırda Suriyanın da şimalında de-fakto kürd muxtar bölgəsi var. Növbə İrana çatıb".

Siyasi şərhçi nəzərə çatdırıb ki, burada önəmli məqam İraq və Suriyada təkcə bölgənin yox, dünyanın ən sərt rejimləri hökmranlıq etməsi idi:

"Lakin bunların içərisini asanlıqla qarışdırdılar, çünki cəmiyyətlər polietnik və polikonfessional olduğu halda, rejimlər dar məzhəb təməlində formalaşaraq digər əhali qruplarının haqqını, hüququnu rədd etmiş, etno-konfessional fərqliliklər ölkələr içərisində ayırıcı xətlərə çevrilmişdi. Nəticədə kənardan toxunuşla bu dövlətlər karton ev kimi çökdülər".

Ş.Cəfərli qeyd edib ki, İranın İraq və Suriya ilə ortaq, oxşar tərəfləri çoxdur:

"Ölkə çoxmillətlidir və sərt rejim var. Amma göründüyü kimi, 2 böyük ordu (Sepah və Arteş), böyük təhlükəsizlik və kəşfiyyat strukturları yetərli olmur".

Firuzə Əliyeva