Rusiya və Ukrayna iyulda sülh bağlayacaq? - AÇIQLAMA
Rusiya Ukraynaya iyunun 2-də görüşün keçirilməsini təklif edib. Belə bir fikir var ki, Rusiya iyulda atəşkəsə gedəcək.
Bu ehtimal nə dərəcədə realdır? İndiki vəziyyətdə atəşkəs Rusiya üçün əlverişlidirmi?
Mövcud suallarla bağlı Sfera.az-a açıqlama verən politoloq Əlimusa İbrahimov Rusiyanın Ukraynaya İstanbulda növbəti görüşün keçirilməsi ilə bağlı çağırış etdiyini bildirib.
Onun sözlərinə görə, lakin Ukraynanın bu təklifi qəbul edib-etmədiyi barədə hələlik rəsmi açıqlama yoxdur: “Məsələ ondadır ki, tərəflər arasında görüşün detalları ilə bağlı fikir ayrılığı mövcuddur. Belə ki, Rusiya tərəfi görüş zamanı hazırladığı memorandumu təqdim edərək, onun ətrafında müzakirələrin aparılmasını təklif edir. Ukrayna isə həmin sənədin görüşdən bir neçə gün əvvəl təqdim olunmasını tələb edir. Kiyev görüşə hazırlıqlı şəkildə qatılmağı üstün tutur. Bu səbəbdən Ukrayna tərəfi Rusiyanın təklifini dərhal cavablandırmağa tələsmir”.
Politoloq qeyd edib ki, bununla belə, ekspertlər Ukraynanın yekunda bu təklifi qəbul edib növbəti görüşə qatılacağı qənaətindədirlər:
“Hər iki tərəfin görüş ehtimalı üzərində düşünməsi müsbət hal kimi qiymətləndirilir və bu prosesin nəticə verəcəyinə dair ümidlər yaradır. Lakin digər tərəfdən, Rusiyanın sərhədə 50 minlik hərbi qüvvə toplayaraq yay kampaniyasına hazırlaşması ilə bağlı yayılan xəbərlər danışıqlardan gözlənilən müsbət nəticələrə dair şübhələri artırır”.
Ə.İbrahimov hazırda ABŞ və Ukrayna tərəfinin Rusiyadan ilk növbədə atəşkəsə razılaşmağı tələb etdiyini qeyd edib.
Müsahibimizin fikrincə, ABŞ-də xüsusilə Tramp və onun komandası hesab edir ki, atəşkəs əldə olunduqdan sonra digər məsələlərin də müzakirəsinə başlamaq mümkün olacaq:
“Rusiya isə danışıqların növbəti mərhələlərində onu nələrin gözlədiyini bilmədən atəşkəsə razılıq vermək istəmir. Bu səbəbdən Rusiyanın atəşkəslə maraqlandığını dəqiq söyləmək çətindir”.
Fidan Hacızadə
Sfera.az
