Yerin nüvəsində xəzinə tapıldı
Almaniyanın Göttingen Universitetində çalışan alimlər Yer kürəsinin dərinliklərində mühüm elmi kəşfə imza atıblar.
Sfera.az türk mediasına istinadən xəbər verir ki, yeni araşdırmalara əsasən, Yerin nüvəsində böyük miqdarda qızıl və digər qiymətli metallar mövcuddur və bu maddələr mantiyadan səthə doğru sızır.
Tədqiqat Havay adalarında yerləşən vulkanik süxurlar üzərində aparılan izotop analizləri ilə həyata keçirilib. Nəticələr göstərib ki, bu süxurların tərkibində nüvədən gələn izlərə rast gəlinib. Xüsusilə rutenium-100 izotopunun bolluğu bu qiymətli metalların Yerin nüvəsində yarandığını sübut edir.
Araşdırmanı aparan alimlərdən biri, Nils Messlinq, ilk nəticələr barədə belə bildirib: “İlk məlumatlar daxil olanda başa düşdük ki, sanki qızılla büdrəmişik”.
Tədqiqatçılar izotop fərqlərini aşkar edə bilən yeni bir analiz texnikası hazırlayıblar. Bu üsul ilk dəfə olaraq səthdəki rutenium ilə nüvədən gələn rutenium arasındakı fərqi dəqiq şəkildə ölçməyə imkan verib.
Araşdırmada iştirak edən digər alim, professor Mattias Vilbold isə bildirib: “Yerin nüvəsi, əvvəllər güman edildiyi kimi, təcrid olunmuş bir struktur deyil”.
Vilbold əlavə edib ki, okean adaları əslində mantiya ilə nüvə sərhədindən səthə doğru qalxan nəhəng qaya kütlələri nəticəsində yaranır.
Bu kəşf Yer kürəsinin daxili quruluşuna və metallarla zəngin maddələrin dinamikasına dair mövcud elmi yanaşmaları dəyişdirə bilər.
Fidan Hacızadə
Sfera.az
