“Rusiya və Ukrayna atəşkəsə çox yaxındır” - Tramp

ABŞ Prezidenti Donald Tramp Rusiya və Ukrayna arasında davam edən münaqişəyə dair açıqlama verib. Tramp hər iki ölkənin atəşkəs sazişi imzalamağa “çox yaxın” olduğunu bildirib və tərəfləri yüksək səviyyədə görüşərək razılaşmanı yekunlaşdırmağa çağırıb.

Sfera.az xəbər verir ki, 88 yaşında vəfat edən katoliklərin ruhani lideri Papa Fransiskin dəfn mərasimində iştirak etmək üçün İtaliyaya səfər edən Tramp Romaya eniş etdikdən qısa müddət sonra şəxsi “Truth Social” platformasında açıqlama yayıb.

Paylaşımında Tramp bildirib:

“Az əvvəl Romaya endim. Rusiya və Ukrayna arasında aparılan danışıqlar baxımından yaxşı bir gündür. Tərəflər razılaşmaya çox yaxındır və indi ən yüksək səviyyədə bir araya gələrək bu prosesi yekunlaşdırmalıdırlar. Əsas məsələlərin əksəriyyəti üzrə razılıq əldə olunub. Qan axıdılmasını dərhal dayandırın. Biz bu qəddar və mənasız müharibənin sona çatmasına kömək etmək üçün lazım olan hər yerdə olacağıq”.

Hazırda Rusiya və Ukrayna arasında atəşkəs istiqamətində irəliləyişin əldə olunması beynəlxalq ictimaiyyət tərəfindən diqqətlə izlənilir.

Bəsti Rəfizadə