“Ticarət müharibəsini davam etdirmək mümkün deyil” - ABŞ maliyyə naziri

ABŞ Maliyyə naziri Skott Bessent Çin ilə davam edən ticarət müharibəsinin artıq ölkə üçün dözülməz bir yükə çevrildiyini bildirib. Nazir ABŞ iqtisadiyyatının bu qədər ağır gömrük tariflərini daşıya bilməyəcəyini qeyd edərək, ticarət müharibəsinin uzunmüddətli davamının mümkün olmadığını etiraf edib.

Sfera.az xarici mediaya istinadən xəbər verir ki, Bessentin bu açıqlamaları "JPMorgan" tərəfindən təşkil edilən bir konfransda səsləndirilib.

Nazir, ABŞ və Çin arasında tətbiq olunan yüksək tariflərin artıq ticarət embarqosuna çevrildiyini deyib və tərəflərin gec-tez razılaşma əldə edəcəyinə ümid etdiyini vurğulayıb.

Nazirin çıxışından sonra Nyu-York birjasında S&P 500 və Nasdaq indeksləri müsbət istiqamətdə hərəkət edib. S&P 500 indeksi 2.5 faiz, texnologiya yönümlü Nasdaq isə 2.7 faiz yüksəlib.

Əmtəə bazarlarında da hərəkətlilik müşahidə olunub. "Brent" neftinin qiyməti 1.5 faiz artaraq 67.27 dollara çatıb. Qızılın qiyməti isə gün ərzində 3.500 dollara qədər yüksəldikdən sonra 3.375 dollara geriləyib.

ABŞ Prezidenti Trampın ABŞ Mərkəzi Bankının (FED) rəhbəri Jerom Pauelli vəzifədən azad edəcəyinə dair ehtimallar da bazarlarda dalğalanmalara səbəb olub. Tramp, inflyasiyanın aşağı səviyyədə olduğunu və faiz dərəcələrinin endirilməməsi halında iqtisadi yavaşlamanın baş verə biləcəyini bildirib.

Bessent Çinlə razılaşma ümidini ifadə etsə də, hazırda ABŞ və Çin arasında rəsmi danışıqların aparılmadığını bildirib. Ağ Ev məsələ ilə bağlı hər hansı şərh verməyib.

Bəsti Rəfizadə