İstanbulda telefon xətləri kəsildi

İstanbulda baş verən ardıcıl zəlzələlərdən sonra mobil rabitə şəbəkələrində problemlər müşahidə olunmağa başlayıb. 

Sfera.az Türkiyə mediyasına istinadən xəbər verir ki, şəhər sakinləri telefon xətlərinin zəng çalmadığını, siqnalın zəif olduğunu və ümumiyyətlə mobil xidmətlərdən istifadə edə bilmədiklərini bildirirlər.

Zəlzələdən dərhal sonra sosial şəbəkələrdə və texnoloji forumlarda istifadəçilər mobil şəbəkələrin işləmədiyini qeyd ediblər. Ən çox şikayət edilən məsələlər arasında zənglərin qarşı tərəfə çatmaması, SMS-lərin göndərilə bilməməsi və internet bağlantısının zəifləməsi yer alır. Bu hal xüsusilə fövqəladə hallarda rabitənin əhəmiyyətini bir daha gündəmə gətirib. Türkiyənin ən böyük rabitə provayderlərindən biri olan Türk Telekomun rəsmi dəstək hesabları və əlaqədar qurumlar tərəfindən hələlik rəsmi açıqlama verilməyib. Lakin istifadəçilərin real vaxtda şəbəkə problemlərini izləyə bildiyi “Downdetector” platformasında Türkiyə saatı ilə 13:00-dan etibarən Türk Telekomla bağlı ciddi şikayətlərin artdığı görünür.

Hazırda telefon şəbəkələrinin tam nə zaman bərpa ediləcəyi ilə bağlı rəsmi məlumat yoxdur. Ekspertlər təbii fəlakətlər zamanı rabitə infrastrukturunun zədələnməsinin mümkün olduğunu və xidmətin tam bərpasının müəyyən vaxt ala biləcəyini bildirirlər. Vətəndaşlara, şəbəkə tam bərpa olunana qədər alternativ əlaqə vasitələrindən (internet zəngləri, mesajlaşma tətbiqləri və s.) istifadə etmələri tövsiyə olunur. Rəsmi qurumlardan mövzu ilə bağlı açıqlama verildiyi halda yenilənmiş məlumat təqdim olunacaq.

Fidan Hacızadə