Etirazlar başladı - Tramp hakimiyyətdən gedəcək?

ABŞ-də minlərlə insan prezident Donald Tramp və onun administrasiyasının siyasətinə etiraz etmək üçün küçələrə çıxıb. Etirazçılar hesab edirlər ki, Tramp vətəndaş azadlıqlarını və hüququn aliliyini heçə sayır, miqrasiya siyasətində həddindən artıq sərt addımlar atır, federal iş yerlərini ixtisar edir və bu davranışları ilə ölkə iqtisadiyyatına zərər vurur.

Maraqlıdır, bu hadisələr fonunda Trampa yenidən impiçment elan edilə bilərmi?

Mövzu ilə bağlı Sfera.az-a açıqlama verən siyasi şərhçi Kənan Novruzov bildirib ki, impiçment məsələsinin gündəmə gəlmə ehtimalı var:

“ABŞ-də Donald Tramp hakimiyyətə gələndən sonra ölkənin həm daxili, həm xaricində ciddi dəyişikliklər müşahidə olunur. Bu radikal addımlar biri də ABŞ-nin tarif siyasəti ilə bağlı oldu. Son vaxtlar ABŞ daxilində siyasətlə bağlı mövcud iqtidara qarşı aksiyalar başlayır. Eyni zamanda, Trampın komandasında da fikir ayrılıqları müşahidə olunmaqdadır. Bu fikir ayrılıqlarının göründüyündən daha dərin olduğu da istisna deyil. Tramp və onun vaxtilə əsas əqidə yoldaşlarından biri olan və yaxud bizə elə təqdim olunan iş adamı İlon Mask arasında da artıq ziddiyət müşahidə olunur. ABŞ daxilindəki bu böhanın böyüyəcəyi gözlənilir. Təkcə məsələ tariflə bağlı deyil. Həmçinin, ABŞ-nin Ukrayna ilə bağlı mövqeyinin dəyişməsi də ciddi narazılıqlara səbəb olur”. 

K.Novruzovun fikrincə, Tramp hakimiyyəti üçün hansısa təhdid və ya təhlükə yoxdur. O, öz hakimiyyətini qorumağı bacaracaq. Lazım gələrsə, Rusiya da bu məsələdə Trampa kömək edəcək. 

Firuzə Əliyeva