3 Eyfel Qülləsinə bərabər körpü tikilir - FOTO
Çinin cənub-qərbində yerləşən Guizhou əyalətində tikilməkdə olan “Huajiang Grand Canyon” körpüsünün inşası son mərhələyə daxil olunub.
Sfera.az “CNN”ə istinadən xəbər verir ki, bu mühəndislik möcüzəsi çay səviyyəsindən təxminən 625 metr yüksəklikdə yerləşəcək və Fransadakı Millau Viyadükündən 288 metr uzun olacaq.
Guizhou mürəkkəb relyefə malik dağlıq bölgədir və “yer çatını” xatırladan “Huajiang Grand Canyon” üzərində inşa edilən bu polad truss asma körpü ümumi 2890 metr uzunluğa malikdir. Trussların ümumi çəkisi isə təxminən 22 min ton yəni üç Eyfel qülləsinin çəkisinə bərabərdir.
Tikintiyə 2022-ci ilin 18 yanvarında başlanılıb və 2025-ci ilin 30 iyununda tamamlanması planlaşdırılır. Layihənin 95%-nin artıq başa çatdığını bildirən “Guizhou Highway Group”-un baş mühəndisi Zhang Shenglin qeyd edib ki, körpü 2025-ci ilin ikinci yarısında istifadəyə veriləcək.
Çin, xüsusilə də Shenzhen şəhərindən 1287 kilometr qərbdə yerləşən Guizhou kimi dağlıq və nisbətən az inkişaf etmiş bölgələrdə infrastrukturu gücləndirmək üçün genişmiqyaslı layihələr həyata keçirir. Mütəxəssislərin sözlərinə görə, bu layihə təkcə rekordları qırmaq məqsədi daşımır, eyni zamanda əhəmiyyətli sosial-iqtisadi faydalar gətirəcək.
Qeyd edək ki, hazırda dünyanın ən hündür 100 körpüsünün yarısı Guizhou əyalətində yerləşir.
Fidan Hacızadə
