“Bütün ingilisləri öldürəcəyik” - Rusiyadan İngiltərəyə təhdid

Rusiyanın dövlət televiziyasında yayımlanan proqramda, İngiltərəyə və Baş nazir Keir Starmerə qarşı nüvə müharibəsi ilə bağlı ciddi təhdidlər səsləndirilib. 

Sfera.az xəbər verir ki, İngiltərənin nüfuzlu nəşrlərindən olan "The Mirror" qəzetinin xəbərinə görə, Rusiya Prezidenti Vladimir Putinin sözçüsü Böyük Britaniya hökumətini nüvə silahı ilə hədələyib.

Rusiyanın Ukraynadakı hərbi müdaxiləsini açıq şəkildə müdafiə edən tanınmış televiziya aparıcısı Vladimir Solovyov, Qərbin və Avropa ölkələrinin Ukraynaya verdiyi dəstəyə sərt cavab verərək, İngiltərə və ABŞ-nin Rusiyaya birbaşa müharibə elan etdiyini bildirib.

Solovyov deyib ki, Qərb ölkələrinin liderləri də cəbhədə döyüşən əsgərlər kimi nəticələrini hiss edəcəklər. O, İngiltərə, Fransa, Almaniya və Baltikyanı ölkələrə yönəlik açıq təhdidində “Taleyiniz faciəli olacaq. Bütün bu hay-küyünüz sizə heç bir fayda verməyəcək”, - deyə xəbərdarlıq edib.

İngilis xalqına qarşı yönələn təhdidlərdə, “Onlar tamamilə yox ediləcəklər. Hamısını öldürəcəyik”,- deyə bildirilib.

Qeyd edək ki,  Rusiya Ukraynanın şəhər mərkəzlərini və mülki obyektlərini hədəf almaqda davam edir. Son olaraq bazar günü Sumi şəhərinə edilən raket hücumu nəticəsində 35 nəfər həlak olub, 117 nəfər yaralanıb.

Bəsti Rəfizadə