DİM buraxılış imtahanında səhvə yol verib? - RƏSMİ AÇIQLAMA

Aprelin 13-də keçirilmiş 9-cu sinif buraxılış imtahanı ilə bağlı bir sıra iddialar var.

Belə ki, təhsil eksperti Kamran Əsədov bildirib ki, dinləmə mətni əsasında ümumilikdə 4 test tapşırığı cavablandırılması nəzərdə tutulsa da, imtahan zamanı mətni iki dəfə dinlətdikdən sonra nəzarətçi tərəfindən elan olunub ki, şagirdlər dinləməyə əsasən 6 suala cavab verməlidirlər. Beləliklə, şagirdlərdə çaşqınlıq yaranıb. Bu da psixoloji stress, diqqət itkisi və nəticədə ümumi cavab keyfiyyətinin aşağı düşməsi ilə nəticələnib.

Bəs bu iddiaların doğruluq payı varmı? Ümumiyyətlə, bu barədə şikayət daxil olubmu?

Məsələ ilə bağlı Sfera.az Dövlət İmtahan Mərkəzi (DİM) ilə əlaqə saxlayıb. DİM-in mətbuat katibi Xanlar Xanlarzadə bildirib ki, bu məsələ yerində həll olunub:

“Ümumi (9 illik) orta təhsil səviyyəsi üzrə buraxılış imtahanında xarici dil fənni üzrə 4 tapşırıq dinləyib-anlama bacarıqlarının yoxlanılmasına aiddir. Bu imtahandan öncə şagirdlərə verilən yaddaş kitabçasında, həmçinin imtahan zamanı sual kitabçalarının üzərində olan qısa təlimatda da göstərilib. Sadəcə mətnlə bağlı təlimat səsləndirilərkən “4” əvəzinə “6” deyilib. Bu yerində həll oluna bilən texniki məsələdir və imtahanın məzmununa heç bir təsir göstərmir. İmtahan başlamadan öncə bütün imtahan rəhbərlərinə və nəzarətçilərə bununla bağlı məlumat verilib və əvvəlcədən şagirdlərin də diqqətinə çatdırılıb. Yəni məsələ yerində həll olunub, ona görə də bununla bağlı DİM-ə heç bir müraciət də daxil olmayıb”.

Firuzə Əliyeva