Zelenski Rusiya ordusunda döyüşən çinlilərin sayını açıqladı

Donetskdə Rusiya ordusunda döyüşərkən Ukrayna qüvvələri tərəfindən əsir alınan iki Çin vətəndaşı Van Quançunq və Çjan Renbo Ukrayna Təhlükəsizlik Xidməti tərəfindən təşkil olunan mətbuat konfransında jurnalistlər qarşısına çıxarılıb. Çin əvvəlcə vətəndaşlarının Rusiya üçün döyüşdüyü iddialarını rədd etsə də, Ukraynanın bu addımından sonra tərəfləri məsuliyyətsiz açıqlamalardan çəkinməyə çağırıb.

Sfera.az “Posta” qəzetinə istinadən xəbər verir ki, çinli əsgərlər mətbuat qarşısında muzdlu olaraq döyüşdüklərini, Çin dövləti ilə heç bir əlaqələrinin olmadığını bildiriblər.

Onların sözlərinə görə, "TikTok" və digər platformalarda verilən elanlarla aldadılaraq Rusiyaya cəlb olunublar.

Ukrayna Prezidenti Volodimir Zelenski, Rusiyanı Çin və digər ölkələrdən döyüşçülər toplamaqda ittiham edib. O, azı bir neçə yüz Çin vətəndaşının Rusiya ordusunda vuruşduğunu və bunun Putinin müharibəni bitirmək əvəzinə genişləndirmək istədiyini göstərdiyini deyib.

Əsir düşən Van və Çjan, Rusiyanın onlara yalan danışdığını, çətin şəraitdə saxlanıldıqlarını və gündə cəmi bir ovuc çiy düyü ilə yaşadıqlarını bildiriblər. Onlar heç bir Ukrayna əsgərini öldürmədiklərini xüsusi vurğulayıblar və vətənlərinə qayıtmaq istədiklərini, lakin Çində cəza alma ehtimalından xəbərdar olduqlarını da qeyd ediblər.
Çin Xarici İşlər Nazirliyi isə Ukraynanın bu iddialarını qətiyyətlə təkzib edərək, ölkənin Ukrayna münaqişəsindəki mövqeyinin aydın və dəyişməz olduğunu bir daha bəyan edib.

Əsir alınan Çinli döyüşçülərdən biri – Van, Çin vətəndaşlarına müraciət edərək bildirib:

“Bu müharibəyə gəlməyi düşünənlərə səslənirəm: Qətiyyən gəlməyin!”.

Bəsti Rəfizadə