Sovet əsgərlərinə yadplanetlilər hücum edibmiş - ABŞ faktları tapdı
ABŞ-nin Mərkəzi Kəşfiyyat İdarəsi (CIA) tərəfindən məxfiliyindən çıxarılmış sənədlərdə, Sovet İttifaqının dağılmasından əvvəl yadplanetlilərlə sovet əsgərləri arasında baş vermiş sensasiyalı hadisə barədə məlumatlar yer alıb.
Sfera.az “New York Post” nəşrinə istinadən xəbər verir ki, CIA arxivinə daxil edilmiş 250 səhifəlik KQB hesabatı 1991-ci ildə Ukraynada keçirilən hərbi təlimlər zamanı müşahidə edilən naməlum uçan obyekt (UFO) ilə bağlıdır. Sənəddə bildirilir ki, təlim zamanı rus əsgərləri səmanın aşağı qatında uçan, nəlbəki formasında naməlum bir obyekt müşahidə ediblər. Əsgərlərdən biri həmin obyekti raketlə vurub və nəticədə o, yerə çırpılaraq qəzaya uğrayıb.
Hadisə yerində sağ qalan əsgərlərin ifadələrinə görə, qəzaya uğramış obyektdən iri başlı, qara gözlü, qısa boylu beş yadplanetli çıxıb. Bu varlıqlar bir araya gələrək sferik forma alıblar və parlaq işıq saçaraq partlayıblar. Partlayış nəticəsində hadisə yerində olan 23 əsgər daş sütuna çevrilib. Yalnız partlayışa bir qədər uzaq məsafədə olan iki əsgər sağ qala bilib.
CIA sənədlərində qeyd olunur ki, hadisədən sonra həm yadplanetli gəmisinin qalıqları, həm də daşlaşmış əsgərlər KQB tərəfindən toplanaraq Moskva yaxınlığındakı gizli hərbi bazaya aparılıb. Sovet alimlərinin apardığı ilkin araşdırmalarda yadplanetlilərin yaydığı enerjinin insan hüceyrələrini əhəng daşına bənzər maddəyə çevirdiyi müəyyən edilib.
Hadisəni araşdıran CIA agentləri bu qarşıdurmanı “yerdənkənar canlıların qan donduran qisas aktı” kimi dəyərləndirib. Hesabatda həmçinin bildirilir ki, ABŞ Müdafiə Nazirliyi nəzdində fəaliyyət göstərən UAP (Naməlum Hava Hadisələri) İşçi Qrupu da bu kimi obyektlərlə bağlı çoxsaylı sənədlərə malikdir.
CIA-nın hesabatında xüsusi olaraq vurğulanır: “İnsanlıq real təhlükə ilə üz-üzədir. Yadplanetlilərin sahib olduğu texnologiya və silahlar çox inkişaf etmiş səviyyədədir”.
Fidan Hacızadə
