Baş prokuror göstəriş verdi - Mətbuatda gedən yazı araşdırılır

Azərbaycanın Baş prokuroru Zakir Qaralov haqqin.az və virtualaz.org saytlarında dərc olunmuş "İlqar Məmmədovun əsgərləri İran tərəfə keçir” başlıqlı məqalədə əksini tapmış xüsusatlarla bağlı ciddi araşdırmalar aparılmasına dair müvafiq göstərişlər verib.

Femida.az xəbər verir ki, bu barədə Baş prokurorluğun mətbuat xidmətinin rəhbəri Eldar Sultanov virtualaz.org-a bildirib.

Xatırladaq ki, Eynulla Fətullayevin jurnalist araşdırmasında REAL hərəkatının nümayəndələrinin İranın Bakıdakı səfirliyinin ikinci katibi ilə görüşü və əldə olunan gizli sövdələşmələr barədə bəhs olunurdu. Yazıda deyilirdi ki, İran səfirliyinin nümayəndəsi REAL hərəkatına pul verib.

Eldar Sultanovun sözlərinə görə, araşdırmalar Baş prokurorun göstərişi əsasında Baş prokurorluğun Ağır Cinayətlərə dair işlər üzrə İstintaq İdarəsi tərəfindən aparılacaq. Araşdırmaların nəticələri barədə ictimaiyyətə məlumat veriləcək