"Heç kimin tanımadığı silahlara sahibik" - Trampdan TƏHDİD

ABŞ Prezidenti Donald Tramp, dünən axşam Oval Ofisdə jurnalistlərin suallarını cavablandırıb. 
 

Sfera.az xarici mediaya istinadən xəbər verir ki, o, Çin Prezidenti Si Cinpin haqqında müsbət fikirlər səsləndirərək, ABŞ və Çin arasında yaxşı bir razılaşmanın əldə ediləcəyinə inandığını bildirib.

“Si nə edilməli olduğunu tam bilən bir insandır, öz ölkəsini sevir və bir razılaşma etmək istəyəcəyini düşünürəm. Bir nöqtədə telefonla danışacağıq və hər şey hazır olacaq”,–  Tramp qeyd edib.

Ticarət müharibəsinin gərginləşməsi ilə bağlı suala cavab verən Tramp, ABŞ-nin hər sahədə güclü olduğunu vurğulayıb.

“Bu ölkə çox güclüdür. İnsanların anladığından daha güclü. Heç kimin nə olduğunu bilmədiyi silahlarımız var və dünyadakı ən güclü silahlar bizdədir”, – deyə Tramp bildirib. O, ABŞ-yə qarşı durmağı heç bir gücün düşünməyəcəyini də əlavə edib.

Prezident gömrük tariflərinin 90 gün müddətinə dayandırılması qərarının bazarlarda müsbət təsir yaratdığını bildirib. Sonda Tramp, Çin prezidenti ilə tezliklə telefon əlaqəsi quracağını və ona hörmət etdiyini vurğulayıb. Bununla yanaşı, ABŞ-nin ədalətli şəkildə davranıldığı təqdirdə Çin də daxil olmaqla bütün tərəflərlə ticarət və gömrük razılaşmalarına hazır olduğunu deyib.

Fidan Hacızadə