Azərbaycan bu dəfə Türkiyə və İsraili barışdıracaqmı? - AÇIQLAMA
Prezident İlham Əliyev bildirib ki, Türkiyə ilə İsrailin ilk dəfə barışmasında Azərbaycan vasitəçilik edib. İlk böhran zamanı Azərbaycan bu iki ölkənin mövqeyini bir-birinə yaxınlaşdırmaqda fəal rol oynayıb.
Bildiyimiz kimi, hazırda da Türkiyə-İsrail münasibətlərində soyuq küləklər əsir.
Bəs bu dəfə Azərbaycan vasitəçilik edə biləcəkmi?
Sfera.az xəbər verir ki, mövzu ilə bağlı açıqlamasında politoloq Elxan Şahinoğlu bu məsələnin ilk dəfə dövlət başçısı səviyyəsində səsləndiyini deyib.
Onun sözlərinə görə, bu haqda müəyyən ehtimallar mövcud idi, ancaq ilk dəfə prezident səviyyəsində rəsmi Bakının iki dövlət arasında vasitəçi olduğu bildirilməsi Azərbaycan üçün əhəmiyyətli idi:
“Çünki ölkəmiz qardaş və strateji müttəfiqimiz Türkiyə ilə tərəfdaşımız və dostumuz olan İsraillə münasibətlərin gərgin olmasını istəməyib və əlini daşın altına qoyub ki, bu gərginlik ortadan qaldırılsın. Rəsmi Bakının vasitəçiliyi ilkin mərhələdə müsbət nəticə verib. Ankara ilə Tel-Əviv arasında dialoq qurulub, İsrail Prezidentinin Türkiyəyə səfəri reallaşıb. Ancaq Qəzzada başlanan müharibə Türkiyə ilə İsrail arasındakı gərginliyi yenidən artırıb”.
E.Şahinoğlunun fikrincə, Azərbaycan bu gərginliyin ortadan qaldırılması üçün yenə fəallığını artırıb:
“Bu mənada, qısa zaman kəsiyində prezidentin köməkçisi Hikmət Hacıyevin iki dəfə İsrailə səfərini və sonuncu səfəri zamanı Baş nazir Benyamin Netanyahu ilə görüşünü təsadüfi saymıram. Hikmət Hacıyev daha sonra Türkiyəyə səfər edərək Ankarada görüşlər keçirib. İsrail-Türkiyə gərginliyi Azərbaycanın maraqlarına zidd olduğunu kimi, bu iki dövlətin də maraqlarına cavab vermir. Türkiyə və İsrail Suriyada toqquşma ehtimalını azaltmaq üçün dialoq formaları axtarmalıdırlar. Bu mənada ABŞ Prezidenti Donald Trampın iki gün əvvəl Benyamin Netanyahu ilə Ağ Evdə görüşdə Türkiyənin ünvanına söylədiyi fikirlər İsraili Türkiyə ilə qarşıdurmadan çəkindirməlidir. Bakı kimi Vaşinqton da Türkiyə-İsrail gərginliyinin azalmasında maraqlıdır. Bu mənada Ankara ilə Tel-Əviv arasında yenidən dialoq imkanlarının formalaşmasında Bakı ilə Vaşinqton təşəbbüslərini birləşdirə bilərlər”.
Firuzə Əliyeva
