BMT çağırış etdi: "Qəzza ölüm meydanına çevrilib"

“Qəzza ölüm meydanına çevrilib, dinc sakinlər sonsuz ölüm dövrünə düşüb”.
 

Sfera.az xarici mediaya istinadən xəbər verir ki, bu sözləri BMT-nin baş katibi Antonio Quterreş mətbuata açıqlamasında deyib.

Baş katib qeyd edib ki, artıq bir aydan çoxdur Qəzzaya heç bir humanitar yardım daxil olmur. Onun sözlərinə görə, daha əvvəl atəşkəsin qüvvədə olduğu dövrdə girovlar azad edilmiş və həyat qurtaran yardımlar əhaliyə çatdırıla bilmişdi.

Quterreş bu dramatik vəziyyətdə dərhal atəşkəsin əldə olunmasının, bütün məhbusların qeyd-şərtsiz azad edilməsinin və tam humanitar yardımın təmin edilməsinin vacibliyini vurğulayıb. O, həmçinin qeyd edib ki, yardım keçid məntəqələrinin bağlanması təhlükəsizlik və yardım çatdırma imkanlarını ciddi şəkildə məhdudlaşdırır.

4-cü Cenevrə Konvensiyasına istinad edən Quterreş bildirib ki, işğalçı dövlətin əsas öhdəliklərindən biri işğal olunmuş ərazidə yaşayan əhalinin ərzaq və tibbi ehtiyaclarını ödəməkdir. O əlavə edib ki, işğalçı dövlət həmçinin səhiyyə və xəstəxana müəssisələrinin, ictimai səhiyyə və gigiyena xidmətlərinin fəaliyyətini təmin etməli və humanitar yardım proqramlarını qəbul etməlidir.

Fidan Hacızadə