4 yaşında evdən qaçaraq itlərlə yaşamağa başlayan oğlan - FOTO

İvanın həyatı sevimli uşaqlıq nağılından daha çox faciəli romana bənzəyirdi. Spirtli içki aludəçisi babası tərəfindən böyüdülüb və çox vaxt günlərlə evdə tək qalıb. İvan sağ qalmaq üçün küçələrə çıxıb və Moskva yaxınlığındakı çörək sexinin qarşısında yemək dilənməyə başlayıb.

 

Sfera.az bu yazıda sizə cəmi dörd yaşında ailəsi tərəfindən baxımsız qalan bu balaca uşağın həyatı haqqında yazı təqdim edir:
 

İvan Mişukov evdəki pis şərait və baxımsızlıqdan qaçaraq özünü küçələrə atıb. Soyuq rus küçələrində sağ qalmaq demək olar ki, mümkün olmayanda dörd sahibsiz it onun taleyini dəyişib. Gecələr onların qucaqlarında isinir, gündüzlər birlikdə yemək axtarırdı. Vaxt keçdikcə İvan bu it dəstəsinin əsl üzvünə çevrilib.
 

Zaman keçdikcə onunla burada rastlaşdığı küçə itləri arasında möhkəm bağ yaranıb. İvan onlara Cessi, Qoqa, Maşa və Seva adını verib və bu dörd dostla iki il küçələrdə olub.


Uşağı xilas etmək üçün əvvəlcə itləri razı salmaq lazım idi
 

Polis İvanı görüb onu küçədən çıxarmaq istəyəndə işlər onların düşündükləri qədər asan olmayıb. Çünki İvana ailəsi qədər sadiq olan bu itlər heç kimi ona yaxın buraxmırdı. Nəhayət, 1998-ci ildə bir neçə uğursuz cəhddən sonra İvan polis tərəfindən xilas edilib.
 

O vaxt onun beş-altı yaşı var idi, amma, sanki böyüklər kimi həyata sadiq qaldı. Yenə də itlərdən ayrılmaq onun üçün asan deyildi.
 

“Onlar məni sevirdilər, mən də onları sevirdim” - deyirdi İvan illər sonra.

 

İvan uşaq evinə verildi, lakin it ailəsi onu unutmadı. Hətta bir gün uşaq evinin qarşısına gəlib onu axtarırdılar. Təəssüflər olsun ki, hakimiyyət bu sadiq dostları təhlükə kimi görüb aradan götürüb.
 

İvan əsl ailəni yalnız Tatyana Babanina onu övladlığa götürəndə tapdı. Çətin bir başlanğıcdan sonra təhsilini uğurla başa vurdu, dəniz akademiyasını bitirdi və bu gün tam ştatlı işi olan yetkin bir insandır.

Bəs o, özünü necə təcrid etmədi?
 

Bir çox “vəhşi uşaq” həyata uyğunlaşmaqda çətinlik çəksə də, İvan tez bir zamanda təhsilə uyğunlaşdı, nitq qabiliyyətini inkişaf etdirdi və sosial həyata inteqrasiya edə bildi.
 

Bunun ən böyük səbəbi onun küçədə olduğu müddətdə tam təcrid edilməməsi, yəni itlərlə olmasına baxmayaraq insanlarla əlaqəsini tamamilə kəsməməsi idi. Bundan əlavə, onu övladlığa götürən Tatyana Babaninanın sevgi dolu yanaşması, təhsilə verdiyi önəm də bu fərqi yaradan amillərdən olub.

Aysel