Dinozavr izləri tapıldı - 167 milyon il əvvəl yaşayıb - FOTO

Şotlandiyanın Skay adasında aparılan araşdırmalar nəticəsində yeni dinozavr ayaq izləri aşkar edilib. Tapıntılar 167 milyon il əvvəl ət yeyən və ot yeyən dinozavrların birlikdə yaşadığını sübut edib.

Sfera.az xəbər verir ki, Edinburq Universitetindən olan tədqiqatçılar, Skay adasındakı Prens Çarlz Nöqtəsində yerləşən 131 dinozavr ayaq izini təhlil ediblər.

Araşdırmada, T-Rexin əcdadlarından olan ət yeyən meqalozavrların nadir izləri ilə nəhəng ot yeyən sauropodların dairəvi izlərinə rast gəlinib. Alimlər bildiriblər ki, bu kəşf Orta Jura dövründə dinozavrların əsasən su mənbələri ətrafında toplandığını və lagünləri yaşayış yeri kimi seçdiklərini göstərir.

Tədqiqatçılar ayaq izlərinin düzülüşünü və dinozavrların hərəkət tərzini təhlil edərək bu canlıların su kənarlarında toplandığını müəyyən ediblər.

Tədqiqat rəhbəri Ton Blaksli bildirib ki, ayaq izləri bizə ət yeyən teropodlarla uzun boyunlu ot yeyən sauropodların necə davrandığını və hansı mühitlərdə yaşadıqlarını daha yaxşı başa düşməyə kömək edir.

Beş il əvvəl bölgədə tapılan ilk üç ayaq izindən sonra aparılan araşdırmalar Skay adasının Şotlandiyanın ən geniş dinozavr ayaq izi sahələrindən biri olduğunu ortaya çıxarıb.

Alimlər ərazini daha dəqiq öyrənmək üçün minlərlə hava fotosu çəkərək fotogrammetriya üsulu ilə 3D modellər hazırlayıblar. Mütəxəssislər bu bölgədə aparılan araşdırmaların Jura dövrünün ekosistemi haqqında daha çox məlumat verəcəyini düşünürlər.

Bəsti Rəfizadə