"Rusiyanın hücumuna hazır olmalıyıq" - Almaniyanın Baş Qərargah rəisi

Almaniya Müdafiə Nazirliyinin Baş Qərargah rəisi Karsten Broyer, İngiltərə media orqanına verdiyi açıqlamada, Rusiyanın real bir təhdid olduğunu və məcburi hərbi xidmətə qayıdışın zəruri olduğunu bildirib. 

Sfera.az "BBC"yə istinadən xəbər verir ki, Ukrayna işğalı Almaniyanın müharibəyə yanaşma tərzini köklü şəkildə dəyişdirib və ölkə müharibəyə hazırlıq qərarı alıb.

Almaniyada parlament, müdafiə xərclərini sərt borclanma qaydalarından azad etmək qərarı alıb, bunun nəticəsində orduya böyük sərmayə qoyuluşu təsdiqlənib.
Baş Qərargah rəisi Rusiyanın aqressiyasının yalnız Ukrayna ilə məhdudlaşmayacağını və buna görə də müdafiə xərclərinin artırılmasına təcili ehtiyac duyulduğunu qeyd edib:

"Biz Rusiyanın təhdidi altındayıq. Putin tərəfindən təhdid edilirik. Bunu dəf etmək üçün nə lazımdırsa etməliyik".

Broyer, NATO-nun da mümkün hücuma qarşı hazır olmasının lazım olduğunu vurğulayıb:

“Məsələ, nə qədər vaxtın olduğu deyil, Putinin bizə nə qədər vaxt verəcəyidir. Nə qədər tez hazırlansaq, bir o qədər yaxşı olar".

Bəsti Rəfizadə