"BYD" Tesla-nı üstələyir: Satışlar 100 milyard dolları ötüb
Çinin elektrik avtomobil istehsalçısı BYD-nin 2024-cü ildə satışları ilk dəfə olaraq 100 milyard dollarlıq həddi keçərək Teslanı geridə qoyub.
Sfera.az Banco.az-a istinadən xəbər verir ki, şirkətin gəlirləri oktyabr-dekabr dövründə illik müqayisədə 52,7 faiz artaraq 274,9 milyard yuana (38 milyard dollar) çatıb.
BYD-nin eyni dövrdə xalis mənfəəti əvvəlki illə müqayisədə 73,1 faiz artaraq 15 milyard yuana (2,1 milyard dollar) çatıb.
Ötən il şirkətin gəlirləri 2023-cü illə müqayisədə 29 faiz artaraq 771,1 milyard yuana (107 milyard dollar) çatıb. Eyni dövrdə Çin istehsalçısının xalis mənfəəti 34 faiz artaraq 40,3 milyard yuana (5,4 milyard dollar) çatıb.
BYD-nin dollar ifadəsində gəlirləri keçən il 100 milyard dolları keçərək ilk dəfə Tesla-nı ötüb. Tesla ötən il 97,7 milyard dollar gəlir əldə edib.
BYD, keçən il təhvil verilmiş 4,27 milyon (tam və ya qismən elektrik) ilə müqayisədə bu il 5 ilə 6 milyon arasında avtomobil satacağını təxmin edir.
Çinli milyarder Vang Çuanfu tərəfindən qurulan BYD-nin bazar dəyəri martın 18-də Ford (39,4 milyard dollar), "General Motors" (49 milyard dollar) və "Volkswagen"in (66 milyard dollar) ümumi dəyərindən çox olmaqla 162 milyard dolları ötüb.
