Kənd təsərrüfatı ilə bağlı yeni qanun hazırlanır
13:17 / 25.01.2017
1033
"Kənd təsərrüfatında sığortanın stimullaşdırılması haqqında" qanun layihəsi hazırlanır. Layihə may ayında müzakirəyə çıxarılacaq.
Sfera.az xəbər verir ki, bunu Milli Məclisin Aqrar siyasət komitəsinin bu gün keçirilən iclasında komitə sədri Eldar İbrahimov deyib.
O, bildirib ki, yaz sessiyasının qanunvericilik işləri planına daxil edilən "Kənd təsərrüfatında sığortanın stimullaşdırılması haqqında" qanun layihəsi may ayında müzakirəyə çıxarılacaq.
E.İbrahimov qeyd edib ki, ölkəyə valyuta gətirən kənd təsərrüfatı məhsullarının istehsalı və ixracı davam etdiriləcək.
"2015-ci ildə kənd təsərrüfatı məhsullarının 1 mlrd. manat dəyərində ixracı həyata keçirilib. Yəqin ki, bu rəqəm 2016-ci ildə 1 mlrd. manatdan artıqdır. O sahələri inkişaf etdirəcəyik ki, ölkəyə valyuta gətirsin. Bura badam istehsalı da daxildir. Hazırda badam sahələri əsasən Naxçıvanda mövcuddur. Gələcəkdə bu sahələrin Bakı ətrafında olması da mümkündür".
Daha sonra komitənin 2016-cı il payız sessiyasında gördüyü işlər və komitənin 2017-ci il yaz sessiyasının qanunvericilik işləri planı müzakirə olunaraq təsdiqlənib.
