Dünyanın böyük hissəsi riskli isti hava ilə üzləşib - Hesabat

Müstəqil elmi təşkilat olan “Climate Central” 2024-cü ilin dekabrı ilə 2025-ci ilin fevral aylarını əhatə edən dövrdə iqlim dəyişikliklərinin təsiri ilə bağlı hesabat yayımlayıb. 

Sfera.az xarici mətbuata istinadən xəbər verir ki, hesabatda kömür, benzin və metan qazı emissiyalarının hava temperaturuna təsiri təhlil olunub. Araşdırma çərçivəsində 220 ölkə və 940 şəhərdə orta hava temperatur göstəriciləri əsas götürülüb.

Hesabatda bildirilir ki, qeyd olunan dövrdə dünya əhalisinin hər 5 nəfərindən 1-i qeyri-adi istilərlə üzləşib. Bu isə insan fəaliyyəti ilə bağlı iqlim dəyişikliyinin təsirlərinin artıq birbaşa hiss olunmağa başladığını göstərir.

Qeyd olunub ki, bu müddət ərzində dünyada 394 milyon insan “riskli dərəcədə” isti hava şəraitinə məruz qalıb və bu insanların 74 faizi Afrikada yaşayır.

Eyni zamanda hesabatda 28 fevral 2025-ci il tarixində dünya əhalisinin təxminən 37 faizinə — yəni 3 milyard insana yaxın bir kütlənin riskli istilərlə qarşılaşdığı qeyd olunub.

Fidan Hacızadə
sfera.az