Qabyuyan maşından sonra qablarınız niyə çirkli qalır? 7 SƏBƏB

Qabyuyan maşın – mətbəxdə həm vaxt qazanmağa, həm də qayda yaratmağa kömək edən ən yaxşı vasitələrdən biridir. Lakin əgər qab-qacağınız yuyulmadan sonra hələ də ləkəli və ya çirkli görünürsə, bu prosesi təkrarlamaq sizi əlavə vaxt və zəhmət sərf etməyə məcbur edəcək.

Sfera.az bildirir ki, qabları tək yuyuşda parıldadıcı təmizliyə qovuşdurmaq üçün aşağıdakı səhvlərdən çəkinin.

Qabları sadəcə qabyuyan maşına atmaq cazibədar görünsə də, onları əvvəlcədən yüngülcə qırıntılardan və iri yemək qalıqlarından təmizləmək vacibdir. Əks halda, qabyuyan maşının filtri tıxana bilər və bu da yuyulma prosesinin səmərəliliyini azaldar. Əgər köhnə model qabyuyan maşından istifadə edirsinizsə, qabları öncədən yüngülcə yaxalamaq da lazım ola bilər.

2. Qabları düzgün yerləşdirmirsiniz

Ən çox rast gəlinən problemlərdən biri qabları düzgün yerləşdirməməkdir. İstifadə etdiyiniz qabyuyan maşının istehsalçı təlimatlarına uyğun qabları düzün. Su axınını və sprey sistemlərini bağlamamaq üçün qabları bir-birinə sıx yerləşdirməyin.

3. Qabyuyan maşını həddindən artıq doldurursunuz

Qabyuyan maşına həddindən artıq qab yığmaq suyun dövriyyəsini və yuyulma prosesini çətinləşdirir. Böyük əşyalar və ya sıx yığılmış qablar suyun bərabər paylanmasına mane ola bilər. Qabları arasına boşluq buraxaraq yığın ki, su və yuyucu vasitə hər tərəfə çatıb çirkləri yaxşı təmizləyə bilsin.

4. Suyun temperaturu düzgün deyil

Soyuq su qabyuyan maşının effektivliyini azaldır. 49°C-dən aşağı olan su qalıqları tam əridə bilmir və qabları lazımi səviyyədə dezinfeksiya etmir. Su qızdırıcısını 49-66°C arasında tənzimləyin. Bundan əlavə, qabyuyan maşını işə salmazdan əvvəl mətbəx kranında bir neçə saniyə isti su axıdın ki, maşına dərhal isti su gəlsin.

5. Yanlış yuyucu vasitə istifadə edirsiniz

Sizin suyunuzun sərtlik səviyyəsinə uyğun olmayan və ya keyfiyyətsiz yuyucu vasitə qalıqları tam təmizləməyə bilər. Keyfiyyətli yuyucu vasitə istifadə edin və istehsalçının tövsiyə etdiyi dozada istifadə etməyə diqqət edin. Eyni zamanda, parlatıcı (durulama) mayesindən istifadə etməyi unutmayın. Suyunuz sərtdirsə, mineral birləşmələrin qablarınızın üzərinə yapışmaması üçün əlavə su yumşaldıcı və ya mineral parçalayacı vasitələrdən də istifadə edə bilərsiniz.

6. Yanlış yuma rejimi seçirsiniz

Əgər qablarınız bulanıq və ya natamam təmizlənmiş görünürsə, ola bilər ki, düzgün rejim seçməmisiniz. Çox çirkli qablar üçün yüngül və ya sürətli yuma rejimi yetərli olmaya bilər. Tava, qazan və çox çirkli qablar üçün daha intensiv və güclü yuma rejimlərindən istifadə edin.

7. Qabyuyan maşının özünü təmizləmirsiniz

Qabyuyan maşınlar daim istifadədə olduğu üçün müntəzəm təmizlənməlidir. Maşının filtrini yoxlayın və qalıqların yığılmasının qarşısını almaq üçün onu təmizləyin. Filtrləri, su sprey borularını və qapı rezinlərini həftəlik olaraq təmizləyin. Su püskürdən borulardakı dəliklər yemək qalıqları ilə tıxanarsa, suyun təzyiqi azalır və yuma prosesi səmərəsiz olur. Bu boruları çıxarıb diş çöpü və ya kiçik bir fırça ilə təmizləyin. Hər ay boş vəziyyətdə qabyuyan maşında bir stəkan sirkə ilə yuma rejimini işə salın. Bu, əhəng və digər yığıntıları təmizləyərək qabyuyan maşının uzunömürlü olmasına kömək edəcək.