"Astronavtlar sabah Yerə qayıdır" - NASA

NASA-nın açıqladığı əlumata əsasən, astronavtlar Butç Vilmore və Suni Villiams sabah axşam "SpaceX"in "Crew Dragon" kapsulu ilə Yerə dönəcəklər. 

Sfera.az "CNN Türk"ə istinadən xəbər verir ki, NASA astronavtların Floridanın açıq sularına eniş edəcəyini bildirib. Əvvəlcə çərşənbə gününə planlaşdırılan eniş, hava şəraitinin daha əlverişli olması səbəbindən irəli çəkilib.

Astronavtlar Beynəlxalq Kosmik Stansiyada (ISS) mühüm elmi tədqiqatlar aparıblar.

NASA-nın məlumatına görə, astronavtların ISS-də planlaşdırılandan uzun müddət qalması təhlükəsizlik tədbirləri ilə bağlı olub. Bununla yanaşı, NASA astronavtı Nik Haque və rus kosmonavt Aleksandr Qorbunov da "Crew Dragon" vasitəsilə Yerə qayıdacaq. Dönüş səfəri NASA tərəfindən canlı yayımlanacaq.

Qeyd edək ki, ISS missiyaları adətən 6 ay davam edir. Lakin Vilmore və Villiams ISS-də 9 ay qalıb. Bununla belə, onların qalma müddəti NASA astronavtı Frank Rubionun 2023-cü ildə ISS-də keçirdiyi 371 günlük rekord müddətdən xeyli azdır. Kosmosda ən uzun müddət qalan şəxs isə 437 günlə rus kosmonavtı Valeri Polyakov olub.

NASA, astronavtların planlaşdırılandan daha uzun müddət ISS-də qalmasının psixoloji və fiziki təsirlərini də araşdırıb. Ailələrindən uzaq qalan astronavtlar üçün əlavə geyim və şəxsi qulluq vasitələri göndərilib.

Bəsti Rəfizadə