KİV: Pentaqon Panama kanalını ələ keçirmək üçün əməliyyat hazırlayır

ABŞ ordusu Prezident Donald Trampın administrasiyasının göstərişi ilə Panamada ABŞ-nin hərbi mövcudluğunu genişləndirmək üçün bir neçə variant, o cümlədən Panama kanalının ələ keçirilməsi əməliyyatı hazırlayıb.

Sfera.az xəbər verir ki, bu barədə "NBC News" mənbələrə istinadən məlumat yayıb.

Onun sözlərinə görə, ABŞ Cənub Komandanlığı fəaliyyət variantları üzərində işləyir. Qeyd olunub ki, bunlara həm Panama ilə hərbi əməkdaşlığın genişləndirilməsi, həm də Atlantik və Sakit okeanlar arasında kanalın zorla ələ keçirilməsi ehtimalı az olan ssenari daxildir.

Bildirilib ki, hərbi gücdən istifadə ehtimalı Panama tərəfinin hərbi idarələr arasında ikitərəfli tərəfdaşlığı dərinləşdirməyə hazır olmasından asılıdır.

Mənbələr Tramp administrasiyasının məqsədinin Çinin Panama kanalı administrasiyası üzərində iddia edilən təsirini azaltmaq olduğunu bildirib. Mənbələrdən birinə görə, ABŞ-nin Cənub Komandanlığının rəhbəri admiral Alvin Halsi bu həftə müdafiə naziri (Pentaqon rəhbəri) Pit Heqsetə müxtəlif variantların layihələrini artıq təqdim edib.

Onun Panama səfərinin apreldə baş tutacağı gözlənilir. Digər variantlar arasında sadəcə olaraq ABŞ gəmilərinin boğazdan təhlükəsiz keçidinin təmin edilməsi və ya ABŞ-nin bu boğazdakı mülkiyyətinin tam bərpası daxildir. Bundan başqa, ABŞ qoşunları tərəfindən Panamanın mövcud limanlarına nəzarətin yaradılması, eləcə də ABŞ Mühəndislər Ordusu Korpusunun bu ölkənin ərazisində yeni limanların tikintisi nəzərdən keçirilir. (Report)