"Türkiyə Azərbaycanla birgə Ermənistanla da əməkdaşlıq edəcək" - AÇIQLAMA
Balıkesir şəhərində Türkiyənin milli müdafiə naziri Yaşar Gülər hərbçilərlə görüş keçirib.
O görüş zamanı bildirib ki, Cənubi Qafqazda sülh və sabitliyin təmin olunmasında ən etibarlı mövqeyi Türkiyə göstərəcək. Onun sözlərinə görə, Türkiyə Qara dəniz regionunda, Afrikada, Yaxın Şərqdə və Avropada sabitliyin təmin olunmasında əsas rol oynayan ölkələrdən biridir.
Mövzu ilə bağlı Sfera.az-a açıqlama verən siyasi şərhçi Kənan Novruzov Türkiyənin hər zaman regionda sülh və sabitliyin, eyni zamanda təhlükəsizliyin təmin olunmasına dəstək göstərdiyini bildirib.
Onun sözlərinə görə, Cənubi Qafqaz da istisna deyil, xüsusilə II Qarabağ müharibəsi və ondan sonrakı dövrdə Türkiyə daim sülhün bərqərar olmasına çalışıb:
“Azərbaycan və Türkiyə arasındakı münasibətlər, eləcə də iki ölkə arasında imzalanan strateji müttəfiqlik sənədi, Türkiyənin Cənubi Qafqazda sülhün təminatçısı rolunda çıxış etməsinə şərait yaradır. Türkiyə bu gün Cənubi Qafqaz ölkəsi olmasa da, xarici güclərin regiona müdaxiləsinin qarşısını almaq istiqamətində mühüm əhəmiyyətə malikdir. Eyni zamanda, Türkiyə və Ermənistan arasında münasibətlərin normallaşdırılması üçün atılan addımlar da Türkiyənin bölgədə sülh təminatçısı rolunu daha da gücləndirir”.
K.Novruzov həmçinin, Türkiyənin Cənubi Qafqazda sülh və sabitlik təmin etmək məqsədilə yalnız regiondakı ölkələrlə deyil, həm də xarici güclərin müdaxilələrinin qarşısını almağa yönəlmiş aktiv bir rol oynadığını da vurğulayıb.
O bildirib ki, Ankara artıq təkcə Azərbaycanla deyil, gələcəkdə Ermənistanla müəyyən sahələrdə əməkdaşlıq etmə imkanı da əldə edə bilər:
“Bu, Türkiyənin ümumi təsir imkanlarını artıracaq və xarici güclərin regiona müdaxiləsinin qarşısını almağa kömək edəcək. Bu baxımdan, Türkiyə bölgədə “katalizator” rolunu oynamaq istəyən güclərin planlarını pozur. Düşünürəm ki, Ankara bu missiyasını gələcəkdə də uğurla davam etdirəcək”.
Fidan Hacızadə
