Ərdoğanın sərt ritorikası - Türkiyə lideri Trampa əsəbiləşib?
Türkiyə Prezidenti Rəcəb Tayyib Ərdoğan Avropaya xəbərdarlıq edib. Ölkə lideri qeyd edib ki, Türkiyənin Avropa İttifaqına üzvlük prosesi strateji prioritetdir. Ərdoğan vurğulayıb ki, Avropanın təhlükəsizliyi Türkiyəsiz mümkün deyil.
Onun sözlərinə görə, bu gün dünyada “meşə qanunları” hökm sürür və təəssüf ki, güclü olanların zəifləri əzməsi nəticəsində yeni problemlər meydana çıxır.
Mövzu ilə bağlı Sfera.az-a açıqlama verən politoloq Əziz Əlibəyli Türkiyənin Avropa İttifaqına üzvlüyünün əslində bir zərurət olduğunu bildirib. Onun sözlərinə görə, 1980-ci illərdən etibarən bu üzvlük gözləmə rejimindədir:
“Bu müddət ərzində hətta keçmiş SSRİ-dən ayrılan ölkələr belə ittifaqa qəbul olundu, lakin Türkiyəyə münasibətdə bu addım atılmadı. Xüsusilə İslam amili və İslam dünyagörüşü NATO çərçivəsində, SSRİ-yə qarşı mübarizədə qəbul olunsa da, Türkiyənin rifah və iqtisadi ittifaqda yer alması istənilmədi. Türkiyənin artan nüfuzu, dinamik inkişafı, potensialı və gənc əhalisi Avropa üçün fərqlilik yaradırdı və bu, müəyyən narahatlıqlara səbəb olurdu”.
Ə.Əlibəyli bildirib ki, bütün bunlara baxmayaraq, Türkiyədə aparılan hüquq islahatları da üzvlük üçün yetərli nəticə vermədi:
“Tarix göstərir ki, Avropa təhlükəsizlik sınaqları qarşısında Türkiyəyə ehtiyac duyur, lakin onu tam şəkildə qəbul etməkdən çəkinir. Bunun əsas səbəbi isə Avropanın daha geniş strateji hədəflərinin olmasıdır”.
Fidan Hacızadə
