Dünyada ümumi borc 318 trilyon dollara çatıb - Hamı FED-in qərarını gözləyir
Beynəlxalq Maliyyə İnstitutunun (IIF) dərc etdiyi hesabata görə, dünyada borcların ümumi məbləği 318 trilyon dollara çatıb. Ümumi borcun ÜDM-ə nisbəti 1,5 faiz bəndi artaraq 328 faizə yaxın olub. Bu qədər borcun 95 trilyon dolları dövlət borcudur.
Sfera.az xarici mediaya istinadən xəbər verir ki, iqtisadi artım yavaşladıqca, qlobal borcun ÜDM-ə nisbəti 2020-ci ildən bəri ilk dəfə artıb.
ABŞ mərkəzi bankının (FED) uçot dərəcəsini aşağı salacağı gözləntiləri də borclanmanı artırır. Maraqlıdır ki, qlobal borcun 7 trilyon dollar artması əsasən FED-in uçot dərəcəsinin azaldılması gözləntiləri ilə əlaqələndirilir.
IIF həmçinin xəbərdarlıq edir ki, artan maliyyə kəsirləri davam edərsə, bunun əziyyətini hökumətlər çəkəcək. IIF borclanmağa görə bazar reaksiyalarının Böyük Britaniya və Fransadakı siyasi liderlərin vəzifə müddətinə necə təsir etdiyinə dair nümunələr də təqdim edib: “2022-ci ildə Böyük Britaniyada bazar reaksiyası Baş nazir Liz Trussun qısamüddətli səlahiyyət müddətinin sona çatmasına səbəb oldu, oxşar təzyiqlər isə keçən il Fransanın Baş naziri Mişel Barnieri vəzifədən kənarlaşdırdı”.
Vasif
