Madridin mərkəzində qeyri-adi xilasetmə əməliyyatı
Bir neçə gün əvvəl köməyə çağırış alan İspaniyanın paytaxtı Madrid şəhərinin yanğınsöndürmə xidmətinin işçilərinin başına heyrətamiz hekayə gəlib. Belə ki, hadisə yerinə gələndə çoxmərtəbəli yaşayış binasının beşinci mərtəbəsinin pəncərəsinin kənarında oturan keçi görüb təəccübləniblər. Onun necə ora çıxması hələ də sirr olaraq qalır.
Sfera.az bildirir ki, bu maraqlı hadisə barədə fevralın 20-də yerli “Bomberos Madrid Facebook” səhifəsində məlumat verilib.
Məlum olub ki, heyvan beşinci mərtəbədəki mənzilin bağlı pəncərəsinin arxasında olub. Mənzilin özü boş olub, içəridə heç kim olmayıb, ona görə də keçinin buradan pəncərəyə necə çıxdığı məlum deyil.
Yanğınsöndürənlər heyvanı xilas etmək üçün hiylə işlətməli olublar. Ona yalnız qonşu eyvandan çata biliblər, ona görə də mənzildən keçərək ora keçiblər və oradan da bu cür heyvanların sevdiyi yeməklərin köməyi ilə keçini “aldadıblar”. Keçiyə yerkökü və xiyar təklif edilib.
Keçinin çoxmərtəbəli binanın pəncərəsində nə qədər qaldığı məlum deyil, lakin ac heyvan xilasedicilərin şirnikləndirici təklifinə xeyli vaxtdan sonra cavab verdiyi görünür. O, eyvana çıxıb, yanğınsöndürənlər onu tuta biliblər. Daha sonra heyvan hazırda yerləşdiyi Madrid Baytarlıq Təcili Xidmətinə təhvil verilib.
Keçinin necə bu qədər yüksəkliyə qalxdığı hələ də məlum deyil. Heyvanın əslində kimə məxsus olduğu da sirr olaraq qalır və sahiblərinin axtarışı davam edir.
Aysel
