Bakı qarın sınağından çıxa bilirmi? - "Hazırlıq pisdir..."

Son günlər ölkə ərazisinə yağan güclü qar bir sıra yollarda avtomobillərin hərəkətini iflic edib. Bakının mərkəzi hissələrində qar təmizləmə işləri aparılsa da, Yeni Yasamal, Xırdalan, Günəşli, Qaraçuxur və mərkəzdən bir qədər kənar olan ərazilərdə vəziyyət fərqli idi. Burada yaşayan vətəndaşlar saatlarla yollarda qaldı, avtomobillərin hərəkətini çətinləşdi və qəza hallarının sayı artdı.

Mövcud vəziyyət şəhər təsərrüfatının qışa hazır olmadığını göstərir. 

Yaranmış çətinliklərlə bağlı Sfera.az-a açıqlama verən nəqliyyat üzrə ekspert Aslan Əsədov bildirib ki, bu kimi halların hər il təkrarlanması artıq bir ənənəyə çevrilib. 

“Hər dəfə qış mövsümü sərt keçəndə oxşar problemlər, çətinliklər yaranır. Dövlət qurumları, xüsusən də Bakı Şəhər Mənzil-Kommunal Təsərrüfatı İdarəsi açıqlamalarında qışa hazır olduqlarını bəyan edirdilər. Amma bir neçə gün davam edən qar yağışından sonra yaranmış vəziyyət hazırlığın yaxşı olmadığını üzə çıxartdı. Bu il yollara duz səpilməsi və yollardan qarın təmizlənməsi ilə bağlı tədbirlərin yetərli olmadığını gördük. Bu da təmizlik işlərinin tam effektiv aparılmadığını göstərir”, – deyə ekspert qeyd edib. 

A.Əsədov əlavə edib ki, şəhərin əsas yollarında avtomobillərin hərəkəti nəticəsində qar ərisə də, maili, küləkli və ya fırtınalı ərazilərdə vəziyyət daha kritik olub. Hündür və dağlıq ərazilərdə qarın yaratdığı problemlərin daha çox nəzərə çarpdığını bildirən ekspert, bu kimi yerlərdə yolların buz bağlamasının avtomobillərin və piyadaların hərəkətini ciddi şəkildə çətinləşdiyini də vurğulayıb:

“Şəhər sakinləri belə vəziyyətlərdə daha operativ tədbirlər görülməsini və bu problemlərin hər il təkrarlanmaması üçün uzunmüddətli həll yollarının tapılmasını istəyirlər”.

Fidan