Avropa İttifaqı ilə ABŞ arasında ticarət müharibəsi başlayır
Bu həftə Avropa İttifaqı (Aİ) ilə ABŞ arasında ticarət müharibəsi başlayacaq. Aİ həftə əzində ABŞ-nin atdığı addımlara cavab olaraq bəzi məhsullara qarşı idxalı məhdudlaşdıracaq.
Sfera.az xəbər verir ki, bu haqda məlumatı “Financial Times” Avropadakı mənbələrə istinadən yazıb.
Xatırladaq ki, ABŞ Prezidenti Donald Tramp Avropa İttifaqı, Kanada və Meksikadan polad və alüminium idxalına rüsumları artırıb.
Buna cavab olaraq Aİ ABŞ-dən idxal olunan ərzaq məhsullarına məhdudiyyətlər tətbiq etməyə hazırlaşır. “Financial Times”ın məlumatına görə, Avropa Komissiyası gələn həftə sərt idxal məhdudiyyətlərini nəzərdən keçirəcək.
Məhdudiyyətlərin ilkin olaraq Aİ standartlarına cavab verməyən pestisidlərlə yetişdirilən ABŞ məhsullarını hədəf alacağı gözlənilir. Xüsusilə, Aİ fermerlərinin istifadəsinə icazə verilməyən kənd təsərrüfatı kimyəvi maddələri ilə ABŞ-də istehsal edilən soya kimi məhsulların idxalı əngəllənəcək. Aİ-nin yeni səhiyyə komissarı Oliver Varhelyi Avropa Parlamenti, üzv dövlətlər və fermerlərin sərt tələblərinə istinad edərək, "Aİ-də qadağan edilən şeylər Aİ-yə idxal edilməməldir” şəklində açıqlama verib.
ABŞ Prezidenti Donald Tramp ötən həftənin cümə axşamı verdiyi açıqlamada isə Aİ-nin ABŞ-dan gələn məhsullara qadağa qoymasını sərt şəkildə tənqid edib.
ABŞ-nin addımlarına qarşı adekvat tədbirlərin görülməsini Fransa və bəzi üzv dövlətlər müdafiə edir. Aİ yalnız elmi əsaslarla və ayrı-seçkilik yaratmayan ticarət məhdudiyyətlərinə icazə veriləcəyini vurğulayıb.
Vasif
