Türkiyə limanlarında yük dövriyyəsi rekord qırdı

Türkiyənin dəniz limanlarında yük dövriyyəsi 2025-ci ilin yanvar ayında rekord həddə – 48,6 milyon tona çatıb ki, bu da ötən ilin eyni dövrü ilə müqayisədə 12,8 faiz çoxdur.

Sfera.az xəbər verir ki, bu barədə fevralın 9-da Türkiyənin nəqliyyat və infrastruktur naziri Əbdülqədir Uraloğlu məlumat verib.

Onun sözlərinə görə, yanvar ayında Türkiyənin dəniz limanlarına ən çox yük göndərən ölkə Rusiya olub. Türkiyə məhsullarının ixracı baxımından isə İtaliya, ABŞ və İspaniya liderlik edib.

Cari ilin ilk ayında yük dövriyyəsinə görə Türkiyənin ən iri limanları Aliağa (7,72 milyon ton), Kocaeli (7,71 milyon ton) və İskəndərun (6,6 milyon ton) olub.

Nazir vurğulayıb ki, Türkiyə hökuməti qlobal dəniz yükdaşımalarında ölkənin payını artırmaq üçün bütün zəruri tədbirləri görməyə davam edəcək.