Netanyahu-Tramp GÖRÜŞÜ: İran və Qəzza ilə bağlı hansı qərarlar alınacaq? - AÇIQLAMA
İsrailin Baş naziri Benyamin Netanyahu ABŞ Prezidenti Donald Trampın dəvəti ilə paytaxt Vaşinqtona səfər edib. Netanyahunun fevralın 4-də ABŞ Prezidenti Donald Trampın Orta Şərq üzrə xüsusi nümayəndəsi Stiv Vitkoffla, 5-də isə Ağ Evdə Trampla görüşəcəyi gözlənilir.
Səfərdən gözləntilər nələrdir?
Bununla bağlı Sfera.az-a açıqlama verən politoloq Məhəmməd Əsədullazadə deyib ki, Netanyahu HƏMAS-la atəşkəsdən sonra Qəzza zolağından fələstinlilərin köçürülməsində Donald Trampla eyni fikirdədir:
“İkitərəfli görüşdə Yaxın Şərqin siyasi nizamına təsir edəcək qərarlar qəbula edilə bilər. İlk növbədə fikrimcə, Netanyahu Qəzzadan fələstinlilərin köçürülməsi üçün Trampı inandıracaq. Həmçinin İrana qarşı hərbi əməliyyatlar üçün zəmin yaratmağa çalışacaq. Düşünürəm ki, Səudiyyə Ərəbistanı ilə İsrail arasında sülh müqaviləsi və “İbrahim” sazişinin bağlanması da müzakirə obyekti olacaq. Əgər Tramp Qəzzadan fələstinlilərin köçürülməsinə çalışsa, İsraillə ərəb ölkələri arasında “İbrahim” sazişi qüvvədən düşəcək və ərəb ölkələri Ağ Ev sahibinin bu siyasətinə sərt reaksiya verəcək”.
Müsahibimiz bildirdi ki, Qəzzada idarəçiliyi Fələstin Muxtariyyətinə verməklə razılıq da əldə edilə bilər:
“Qəzzada əsas problem HƏMAS-ın varlığıdır. HƏMAS dirəniş göstərərsə, Qəzzadan fələstinlilərin köçürülməsinə gedilə bilər. Yəqin ki, HƏMAS-ın Qəzzadan çıxarılması üçün təkliflər veriləcək. Lakin onlar razılaşmasa, bunun fələstinlilər üçün mənfi nəticələrin olması mümkündür. Digər tərəfdən, Tramp İranın vurulması üçün Netanyahunun təkliflərini qəbul etməyəcək”.
Xatırladaq ki, Netanyahu Vaşinqtona getməzdən əvvəl HƏMAS və Hizbullaha qarşı hücumları ilə Orta Şərqin simasını dəyişdiyini irəli sürərək, bu qərarlarla xəritəni yenidən çəkdiyini iddia edib.
Günay
