"Mənə olunan hücumun əmrini Bidzina İvanişvili verib" - Qaxariya İTTİHAM ETDİ

Gürcüstanın keçmiş Baş naziri, “Gürcüstan Naminə” müxalifət partiyasının lideri Giorgi Qaxariya ona hücumu “Gürcü arzusu” partiyasının fəxri prezidenti Bidzina İvanişvilinin göstərişi ilə əvvəlcədən planlaşdırıldığını iddia edib.

Sfera.az xəbər verir ki, bu barədə “NewsGeorgia” yazıb. 

Qaxaria bunun əvvəlcədən təşkil edilmiş pusqu, siyasi qisas olduğunu bildirib.

“Hücumun əmrini Bidzina İvanişvili verib. İvanişvili uzun müddətdir ki, məni və ailəmi müxtəlif formalarda və müxtəlif üsullarla, o cümlədən ictimai şəkildə hədələyir”,- sabiq Baş nazir qeyd edib.

G.Qaxariya prokurorluqda dindirildikdən sonra açıqlama verib. Müstəntiqlər onu rəsmən zərərçəkmiş kimi tanıyıblar.

Xatırladaq ki, hücum yanvarın 14-nə keçən gecə Batumidəki “Şeraton” otelinin foyesində baş verib. Hadisədən əvvəl baş verənlər, habelə hadisələrdə iştirak edənlərin sayı barədə məlumat verilməyib. Daha sonra xəstəxanada Qaxariyaya burnunun sınığı və beyin silkələnməsi diaqnozu qoyulub.

Şahidlərin sözlərinə görə, hücumda xüsusilə “Gürcü Arzusu” partiyasından olan deputat Dimitri Samxaradze və Acarıstan iqtisadiyyat nazirinin müavini Giorgi Manvelidze iştirak edib.

Firuzə Əliyeva