Zelenski: Ukraynadakı münaqişədə Putin deyil, Tramp qalib gəlməlidir
Ukrayna Prezidenti Volodimir Zelenski iddia edib ki, Rusiya-Ukrayna müharibəsinə son qoyulması Rusiya lideri Vladimir Putinin deyil, ABŞ Prezidenti Donald Trampın qələbəsi olmalıdır.
Sfera.az xəbər verir ki, Bloomberg TV-yə müsahibəsində o, danışıqlara başlamazdan əvvəl ümumi fəaliyyət planı hazırlamağa çağırıb.
“Ukraynada müharibənin dayandırılması məsələsi, məncə, Putinin yox, Trampın qələbəsi olmalıdır. Putin onun üçün heç nə deyil. Amerika daha güclüdür, Avropa daha güclüdür, Çin Rusiyadan güclüdür”, - Zelenski deyib.
O, münaqişəyə son qoymaq üçün Rusiya ilə danışıqlara başlamazdan əvvəl birgə fəaliyyət planı formalaşdırmağa çağırıb. Onun sözlərinə görə, belə bir inkişaf ABŞ, Avropa İttifaqı, Ukrayna və onun xalqının maraqlarına uyğun olacaq.
Xatırladaq ki, bundan əvvəl “The Hill” qəzeti yazmışdı ki, Donald Tramp ABŞ prezidenti vəzifəsinə gəldikdən sonra Rusiya lideri Vladimir Putini Ukrayna üzrə danışıqlar masasına oturmağa məcbur etmək cəhdi ilə onun ünvanına kəskin tənqidi fikirlər səsləndirib. Tramp Rusiyanı xüsusi hərbi əməliyyatı başa çatdırmağa çağırıb. Tramp vurğulayıb ki, Ukrayna ilə bağlı “saziş” əldə olunmasa, ABŞ Rusiyanın ABŞ və digər ölkələrə ixracına yeni sanksiyalar və rüsumlar tətbiq edəcək.
Əzizə
