Trampla Putin arasında mümkün danışıq nə zaman baş tuta bilər?
“Rusiya və ABŞ prezidentləri arasında telefon danışıqları Amerika liderinin inauqurasiyasından bir-iki həftə sonra baş tutub”.
Sfera.az bildirir ki, bununla bağlı “TASS” agentliyi araşdırma aparıb.
Qeyd olunub ki, 2021-ci ilin yanvarında ABŞ-nin hazırkı Prezidenti Co Bayden inauqurasiyasından altı gün sonra Putinlə danışıb.
“Eyni zamanda, 2009-cu ilin yanvarında ABŞ-nin prezidenti Barak Obama ilə Rusiyanın o vaxtkı prezidenti Dmitri Medvedev arasında söhbət olub. 2017-ci ilin yanvarında keçirilən andiçmə mərasimindən səkkiz gün sonra Donald Trampla Putin arasında telefon danışığı olub”.
Agentlik qeyd edib ki, Rusiya lideri 2001-ci ilin yanvarında ABŞ-nin 43-cü prezidentinin andiçmə mərasimindən 11 gün sonra və 2005-ci ilin yanvarında 12 gün sonra Corc Buşla telefonla danışıb.
“İstisna 2013-cü ildə Obamanın ikinci dəfə ABŞ prezidenti vəzifəsinə başlaması zamanı oldu. Belə ki, onlar inauqurasiyadan 40 gün sonra - 2013-cü il martın 1-də danışdılar. Lakin Rusiya lideri amerikalı həmkarını hələ 2012-ci ilin noyabrında telefonla yenidən prezident seçilməsi münasibətilə təbrik etmişdi”.
Qeyd edək ki, Donald Trampın ABŞ prezidenti kimi andiçmə mərasimi yanvarın 20-də Vaşinqtonda baş tutacaq. “CNN” mənbələrə istinadən xəbər verir ki, o, öz komandasına vəzifəsinin icrasına başladıqdan sonra bir neçə gün ərzində Rusiya lideri ilə telefon danışığı təşkil etməyi tapşırıb.
Günay
