Əhalinin NƏZƏRİNƏ: Bu ərazilərdə sürüşmə təhlükəsi yüksəkdir
Son vaxtlar yağıntıların artması bölgələrdə torpaq sürüşməsini artırıb.
Sfera.az xəbər verir ki, Şəki şəhərində 18-ci rayon Tolstoy küçəsində torpaq sürüşməsi qeydə alınıb. Sürüşmədən sonra ərazidəki evlər üçün təhlükəli vəziyyət yaranıb.Evlərin divarlarında iri çatlar əmələ gəlib.
Şəki rayon İcra Hakimiyyətindən bildirilib ki, Məmmədov Teyyub Salman oğlunun yaşadıqları evin yerləşdiyi ərazidə torpaq sürüşməsinin baş verməsi ilə bağlı müraciətinə yerində baxış keçirilərək tədbirlər görülməsi üçün aidiyyəti üzrə müraciət edilib.
Fövqəladə Hallar və Ekologiya və Təbii Sərvətlər Nazirliklərinin nümayəndələrinin iştirakı ilə əraziyə baxış keçirilərək müvafiq akt tərtib edilib.
Şamaxı rayonunun Qonaqkənd kəndin də torpaq sürüşməsi var. Torpaq sürüşməsi nəticəsində kəndin rayon mərkəzi ilə əlaqəsi çətinləşib. Ərazidə asfalt örtüyündə çökmə baş verib.
O da qeyd edilib ki, hazırda ərazidə maşınların hərəkəti davam edir. Problem olan kimi texnikalar cəlb olunur. /Xezerxeber.az
