Restoranda partlayış nəticəsində 6 nəfər həlak oldu
Çexiyanın Most şəhərində restoranda partlayış baş verib
İlkin məlumata görə, qaz balonunun partlaması qızdırıcının aşması nəticəsində baş verib.
Sfera.az bildirir ki, restoranda propan-butan balonunun partlaması nəticəsində bina alovlanıb. Nəticədə 6 nəfər həlak olub.
Baş verən partlayış nəticəsində 6 nəfər ölüb, 8 nəfər yaralanıb. Çexiyanın Yanğın və Xilasetmə Xidməti bildirib ki, restoran və yaxınlıqdakı binalardan 30 nəfər təxliyə edilib.
Ölən və yaralananlar arasında əcnəbilərin olub-olmadığı məlum deyil.
“Hadisə şahidlərinin ilkin məlumatlarına görə, qızdırıcının aşması yanğına səbəb olub” - deyə yanğınsöndürmə briqadasından bildiriblər.
Daxili işlər naziri Vit Rakusan jurnalistlərə bildirib ki, səbəb çox güman ki, restoranın qarşısındakı bağda yıxılan propan-butan qızdırıcısı olub.
Yanğınsöndürmə qrupları tualetdə sıxılmış vəziyyətdə qalan ağır yaralanmış bir restoran işçisini də xilas etdiklərini bildiriblər.
KİV-in məlumatına görə, partlayış zamanı restoranda 20-yə yaxın qonaq olub.
Polis terroru istisna edib. Regional polis direktoru Zbyněk Dvořák qurbanların şəxsiyyətinin hələ də məlum olmadığını bildirib.
Qeyd edək ki, bu, 1990-cı ildən bəri Çexiyada baş verən altıncı ən böyük yanğındır. Ən ölümcül hadisə 2020-ci ilin avqustunda, Bohumində bir mənzilin yandırılması nəticəsində 11 nəfərin ölməsi ilə nəticələnib.
Aynil
