"Ukraynalılar "Türk axını”na hücum ediblər" - Rusiya MN

Ukrayna pilotsuz uçuş aparatları (PUA) vasitəsilə "Türk axını"na (“TurkStream”) hücum edib.

Sfera.az xəbər verir ki, belə bir iddianı Rusiya Müdafiə Nazirliyi “Telegram” kanalında paylaşıb. Həmin məlumata görə, Ukrayna 9 ədəd PUA ilə "Türk axını" boru kəmərindən qaz nəqlini təmin edən Krasnodar bölgəsindəki "Russkaya" kompressor stansiyasına hücum etməyə çalışıb.

Rusiya Müdafiə Nazirliyi bütün PUA-ların vurulduğunu, yerə düşən dağıntıların qaz ölçmə məntəqəsinin binasına və avadanlıqlarına ziyan vurduğunu bildirib.

Açıqlamada kiçik zədələrə baxmayaraq, kompressor stansiyasının “Türk axını” boru kəmərini normal rejimdə işləməsinə maneə yaratmadığı qeyd olunub.

Məlumat üçün bildirək ki, “Türk axını” boru kəməri Rusiya qazının Türkiyəyə ixracına imkan verən kəmərlərdən biridir. Bu kəmər Krasnodardan başlayıb Qara dənizin dibi ilə uzanaraq Türkiyənin Avropa hissəsinə çıxır. Kəmərin illik qaz ötürmə qabiliyyəti 31,5 milyard kub metrdir.

Vasif

Sfera.az