Azərbaycana hava nəqliyyatı ilə səfər edənlərin sayı ARTDI

2024-cü ildə Azərbaycana hava nəqliyyatı ilə 38 ölkədən 3 milyon 523,1 min nəfər səfər edib.

Sfera.az Dövlət Turizm Agentliyinin hesabatına istinadən xəbər verir ki, bu, ötən ilin eyni dövrü ilə müqayisədə 3 ölkə (8,5 %) və 801 min nəfər (32,1 %) çoxdur.

Ötən il Azərbaycana ən çox sərnişin Rusiyadan daşınıb - 967,1 min nəfər. Bu da əvvəlki ilə nisbətən 27,7 % artım deməkdir.

Hesabat dövründə Türkiyədən isə Azərbaycana 864 min 463 nəfər səyahət edib ki, bu da illik müqayisədə 19 % çoxdur.

İlk üçlüyə Birləşmiş Ərəb Əmirlikləri 458 min 333 sərnişinlə (+43,5 %) daxil olub.

Siyahıda daha sonra Gürcüstan (228,7 min sərnişin, +29 %), Səudiyyə Ərəbistanı (115,6 min sərnişin, +7,5 %), Hindistan (109,6 min sərnişin,+3,4 dəfə) Qazaxıstan (108,9 min sərnişin, +27,9 %), İtaliya (61,8 min sərnişin, +79,5 %), Qətər 58,5 min sərnişin, +71,2 %) və Özbəkistan (56,5 min sərnişin, -15,6 %) qərarlaşıb.

İlk onluğa Hindistan və Qətərin daxil olması ilə Küveytlə (48,9 min sərnişin, +15,6 %) İsrail (47,5 min sərnişin, +23,1 %) TOP-10-dan çıxıb.

Ötən ilin təkcə dekabr ayında isə Azərbaycana hava nəqliyyatı ilə 291,2 min sərnişin daşınıb. Bu, əvvəlki ilin eyni ayına nisbətən 22,9 % çoxdur.

O cümlədən, ötən ay Rusiyadan 74 min 909 sərnişin daşınıb ki, bu da illik müqayisədə 18,2 % çoxdur.