Antalyaya rekord sayda turist gəlib – RƏQƏMLƏR
2024-cü ildə Antalyaya gedən turistlərin sayı açıqlanıb.
Sfera.az xəbər verir ki, ötən il Antalya 17 milyon 278 min 103 turisti qəbul edib. Bu rəqəmlə Antalya bir ildə ev sahibliyi etdiyi ümumi ziyarətçi sayında rekorda çatıb.
Peşəkar Otel Rəhbərləri Dərnəyinin (POYD) prezidenti Hakan Saatçioğlu Anadolu Agentliyinə bildirib ki, Antalya turizm sahəsində artıq dünya miqyasında tanınan brend şəhərlərdən biridir.
Turizmin ölkə iqtisadiyyatında mühüm paya malik olduğunu və Antalyanın ölkə iqtisadiyyatına ciddi töhfə verdiyini bildirən Saatçioğlu şəhərdə turizmin daha da inkişaf etdirilməsi üçün həm dövlət, həm də özəl sektorla əməkdaşlıq etdiklərini bildirib.
Saatçioğlu xatırladıb ki, mövsümün əvvəlində 17 milyon turist olacağını proqnozlaşdırıblar və bu proqnoz özünü doğruldub: “Bu qədər insanın şəhərə gəlməsi sevindiricidir. Biz 2025-ci ildə turist sayının 18,5 milyona çatacağını gözləyirik. Turist başına düşən xərclər də artır. 2024-cü ildə adambaşına düşən xərclər 97 dollardan 107 dollara yüksəlib. 2025-ci ildə turist sayındakı artımla bərabər adambaşına düşən xərclərdə də artım olacaq”.
Vasif
