"Sağ qalanlar pilotlarımızın xidmətidir, bəs həyatını itirənləri kimin vicdanına yazaq?" Deputat
Xəbər verdiyimiz kimi, Qazaxıstanda qəzaya uğrayan Azərbaycana məxsus sərnişin təyyarəsinin Rusiyanın “Pantsir” raket sistemi tərəfindən vurulduğu məlum olub.
Bununla bağlı Sfera.az-a açıqlama verən deputat Sahib Alıyev deyib ki, bu, qəsdən edilməyib, amma bir sıra suallara aydınlıq gətirilməlidir:
“Məsələn, vurulan təyyarənin yaxınlıqdakı Mahaçqala, yaxud da Mineralnıye Vodı hava limanına enməsinə niyə izn verilməyib? Niyə o, dənizin o biri tərəfinə, Qazaxıstanın Aktau şəhərinə göndərilib? Xatırlatmaq istəyirəm ki, 2020-ci ilin 9 noyabrında Rusiya helikopteri, həm də hərbi helikopteri Ermənistanınkı ilə səhv salınıb vurulanda Azərbaycan buna görə üzr istəmiş və təzminat ödəmişdi. 2015-ci ildə Rusiyanın Türkiyənin hava sərhədini pozan hərbi təyyarəsi vurulanda da, sərhədpozma halının aniliyi və qəsdən olmadığı nəzərə alınaraq yenə üzr istənilmişdi. Qarşı tərəfdən də eyni addımların atılmasını gözləyərik. Bunu həm də beynəlxalq normalar tələb edir”.
Millət vəkili bildirdi ki, təyyarədəki qəzada sağ qalanların sayının çox olması məhz uçuş heyətinin xidmətidir:
“Bəs həyatını itirənlər kimin vicdanına yazlımalıdır? Təbii ki, hələ də susmaqda davam edənlərin, məsuliyyəti öz üzərlərindən atmağa çalışanların və bunda onlara dəstək çıxanların..”
Türkan
