Colani-Fidan görüşündə nələr müzakirə olunub? - AÇIQLAMA

Ötən gün Türkiyənin xarici işlər naziri Hakan Fidan Suriyanın yeni hakimiyyəti ilə danışıqlar aparmaq üçün Dəməşqə səfər edib.

Maraqlıdır, səfər zamanı nələr müzakirə olunub?

Bununla bağlı Sfera.az-a açıqlama verən siyasi şərhçi Kənan Novruzov deyib ki, Suriyada Bəşər Əsəd rejiminin devrilməsindən sonra Türkiyə ilə yeni hakimiyyət arasında təmaslar intensivləşib:

“Bunun əsas səbəbi rəsmi Ankaranın regionda möhkəmlənmə cəhdləridir. Ehtimal etmək olar ki, Suriyadakı yeni hakimiyyətin lideri Əhməd əş-Şaara ilə Türkiyə arasında əvvəlcədən müəyyən danışıqlar olub və razılıq əldə edilib. Bu razılığa görə, Suriyanın yeni hakimiyyətinin ölkənin terrorçulardan təmizlənməsində Türkiyəyə dəstək verməsi istisna deyil. Fidanın Suriyaya səfəri zamanı, yəqin ki, xüsusilə terrorla mübarizə məsələləri müzakirə edilib".

Ekspertin sözlərinə görə, bundan sonrakı mərhələdə rəsmi Ankara mümkün qədər çalışacaq ki, Suriyadakı yeni hakimiyyətə təsir imkanı çox olsun:

“Yeni iqtidarın Türkiyənin maraqlarına uyğun davranması Ankara üçün strateji əhəmiyyətli məsələdir. Bu xüsusda xarici işlər nazirinin Suriyaya səfəri xüsusi əhəmiyyətlidir. Perspektivdə Ankara-Dəməşq münasibətlərinin inkişafı gözləniləndir. Bu isə özünü Suriyanın tamamilə terrordan təmizlənməsində və Türkiyənin təhlükəsizliyinin təmin olunmasında göstərə bilər”.

Günay Rəsulqızı