Bu peşə sahibləri Altsheymer xəstəliyinə tutulmurlar - TƏDQİQAT
Altsheymer xəstəliyi, xüsusilə yaşlı insanları təsirləndirən ciddi bir ictimai sağlamlıq problemi olaraq qalır.
Sfera.az xəbər verir ki, Almaniyada təxminən iki milyon insan bu xəstəlikdən əziyyət çəkir və hər il 400 mindən çox yeni hadisə qeydə alınır. Mütəxəssislər, xəstəlikdən qorunmaq üçün sağlam həyat tərzinin və zehni fəaliyyətlərin vacibliyinə diqqət çəkirlər. Edilən bir araşdırma, xüsusilə taksi və təcili yardım sürücülərinin Altsheymerdən ölüm nisbətlərinin digər peşələrlə müqayisədə daha aşağı olduğunu göstərib.
9 milyon ölüm araşdırılıb
ABŞ mərkəzli BMJ tibb jurnalında dərc olunan araşdırma çərçivəsində 2020-2022-ci illər arasında təxminən doqquz milyon yetkinin ölümü təhlil edilib. ABŞ-də aparılan bu araşdırmada 440-dan çox peşə qrupu qiymətləndirilib. Nəticələrə əsasən, taksi və təcili yardım sürücülərinin Altsheymer səbəbilə ölüm nisbətləri digər peşə qruplarına nisbətən nəzərəçarpacaq dərəcədə aşağı olduğu bəlli olub.
Araşdırmaçılar, bu vəziyyətin beyindəki Hippokampus adlı bir hissə ilə əlaqəli ola biləcəyini düşünürlər. Hippokampus, beyində məkan və istiqamət tapma kimi koqnitiv funksiyaları idarə edən bir hissədir. Məsələn, Londondakı taksi sürücülərinin Hippokampuslarının ümumi əhali ilə müqayisədə daha böyük olduğu elmi olaraq sübut edilib. Eyni zamanda Altsheymerin inkişafında kritik rol oynayan bu hissə tez-tez istifadə edildikdə güclənə bilir. Bu, peşələrin Altsheymerdən ölüm nisbətinə təsiri ilə bağlı yeni ipucları təqdim edir.
Nəticələr hələ dəqiq deyil
Bununla belə, araşdırmaçılar nəticələrin hələ qəti olmadığını bildirirlər. Altsheymerə meylli insanların adətən bu cür çətin peşələrə yönəlməməsi və ya peşədə uzun müddət qalmaması da başqa bir mümkün izah olaraq irəli sürülür. Araşdırmanın müəllifləri məkandan asılı bacarıqlarının Altsheymerdən qorunmada təsirini dəqiq müəyyənləşdirmək üçün əlavə araşdırmalara ehtiyac olduğunu vurğulayırlar.
“Nəticələri qəti dəlil kimi deyil, bir hipotez olaraq qiymətləndirmək lazımdır,” - deyən araşdırmaçılar, Altsheymer ilə peşə arasındakı əlaqənin daha ətraflı şəkildə öyrənilməsinin zəruri olduğunu qeyd edirlər.
İnci
