Xamenei Əsədə görə bu ölkələri günahlandırdı: "İranda ümid edirlər ki..." - AÇIQLAMA

İranın ali dini lideri Ayətullah Əli Xamenei Suriyada Əsədin devrilməsinə görə üç ölkəni günahlandırıb. Bu üç ölkədən ikisinin ABŞ və İsrail olduğunu desə də, üçüncüsünü sadəcə “Suriyaya qonşu olan ölkə” adlandırıb.

Maraqlıdır, Xameneinin adını çəkmədiyi üçüncü ölkə hansıdır?

Mövzu ilə bağlı Sfera.az-a açıqlama verən politoloq Asif Nərimanlı bildirib ki, söhbətin Türkiyədən getdiyi məlumdur:

“Ankara daha öncə Dəməşqdə görüşün keçirilməsi, müxalifətlə sülh danışıqlarının başlanması və qaçqınların geri qayıdışına şəraitin yaradılması təklifini versə də, Əsəd bundan yayındı. İstisna deyil ki, Əsədin Ərdoğanla görüşdən imtina etməsində İranın da təsiri olub. Lakin Suriyada İran-Rusiya və ABŞ-İsrail cəbhəsi arasında balansı təmin edən Ankaranın Əsəd məsələsində ikincilərlə birlikdə olması hakimiyyət dəyişikliyi və Tehranın strateji itkisi ilə nəticələndi”.

Onun sözlərinə görə, Xameneinin Türkiyənin adını çəkməməsi Tehranın hazırda möhtac olduğu Ankara ilə körpüləri tamamilə yandırmamaq istəyindən qaynaqlanır:

“Çünki Türkiyə Suriyada hələ də balansı dəyişə biləcək rolunu saxlayır. İranda ümid edirlər ki, Ankara PYD/YPG məsələsində Vaşinqton-Təl-Əviv cəbhəsi ilə tərs düşəcəyi təqdirdə Tehranla yenidən yaxınlaşacaq, bu da onlara Suriyada müqavimət gücünü Türkiyə vasitəsilə saxlamaq, itirdiklərini müəyyən qədər kompensasiya etmək imkanı verə bilər”.

Firuzə Əliyeva

Sfera.az